भारतय् धाकुफसं सछिम्हं मल्याक सित

भारतय् धुलं जाःगु शक्तिशाली धाकुफय वयाः सछिंम्हं मल्याक मनूतय् ज्यान वंगु दु । थ्व धाकुफसं यानाः राजस्थान व उत्तर प्रदेश यक्व प्रभावित जूगु दु । बुधवाः वःगु धाकुफय्या कारणं थासय्थासय् मतया लाइन वंगु दुसा यक्व थासय् सीमा क्वःदःगु, छेँ दुंगु दु ।

सीपिं मध्ये अप्वः धयाथें बहनी द्यनाच्वंबलय् छेँ दुनाः व मलखं लानाः सीगु खः । थ्व मौसमय् भारतय् धुलं जाःगु धाकुफय् वइगु स्वाभाविक खःसां थुलिमछि मनूत छक्वः सीगु धाःसा अजूचायापुगु खँ धाःगु दु ।धाकुफसं राजस्थानया अलवर, भरतपुर व ढोलपुरय् दकलय् अप्वः प्रभावित याःगु दु ।

थन ३१ म्हेसिया ज्यान वंगु खः । राजस्थान विपद व्यवस्थापनया सचिव हेमन्त गेरां थःम्हं विपद व्यवस्थापनय् ज्या यानागु नीदँया दथुइ आःतक थपाय्सं बांमलाःगु अवस्था वःगु मसिउनिगु खँ धयादीगु दु । अथेहे उत्तर प्रदेशय् ४५ म्ह सीगु दुसा आगरया ३६ म्हेसिया ज्यान वंगु दु ।