ने. सं. ११४३ चौलाथ्व तृतीया -

अमेरिकी सेनाय् ट्रान्सजेन्डर दुहां वयेमदइगु

अमेरिकाया सर्वोच्च अदालतं राष्ट्रपति डोनाल्ड ट्रम्पया ट्रान्सजेन्डर्सतय्त सेनाय् दुत मकायेगु नीतियात लागू यायेत स्वीकृति बिउगु दु ।
थ्व मामिलाय् सर्वोच्च अदालतया गुम्ह न्यायाधीशतय् दथुइ मतान्तर जुइवं ५–४या ल्याखं स्वीकृति बिउगु खः । अथे खःसां थ्व मामिलाय् क्वय्या अदालतय् मुद्दा न्ह्याके धाःसा दइगु खँ धाःगु दु ।

सर्वोच्चया प्यम्ह न्यायाधीशतय्सं ट्रम्पया थ्व नीतिया विरोध याःगु खः । ट्रम्पं प्रशासनं ट्रान्सजेन्डरतय्त सेनाय् नियुक्त यात धाःसा सेनाया प्रभाव व क्षमताय तःधंगु जोखिम ब्वलनीगु खँ धाःगु दु । ट्रम्प स्वयां न्ह्यया राष्ट्रपति बराक ओबामां ट्रान्सजेन्डरतय्त सेनाय् भती यायेगु नीति लागू याःगु खः ।

थ्व नीतिइ ट्रान्सजेन्डरत सेनाय् भर्ती जुइ दइगु जक मखु, थुकिया लिसें लिंग सर्जरी यायेगु निंतिं सरकारी ग्वाहालि नं दइगु प्रावधान तयातःगु खः ।थ्व नीति कथं सेनां वंगु २०१७ जुलाइ १ निसें ट्रान्सजेन्डरतय्त भर्ना कायेमाःगु खः, तर ट्रम्प प्रशासनं थुकिया सीमा सन् २०१८ या जनवरी १ तक न्ह्याका बीगु खःसा लिपा थ्व नीतियात पूवंक हे बर्खास्त यानाबिउगु खः ।

सेनाय् ट्रान्सजेन्डरतय्त भर्ना दिकाबिउगुयात कयाः क्वय्या अदालतय् यक्व हे रिट लायेधुंकूगु दु । थ्व लिपा प्रशासनं मेगु हे नीति हयाः ट्रान्सजेन्डरतय्त बीगु सेवाय् ब्यापक प्रतिबन्ध तयाबिउगु खः । लिपा थ्व प्रतिबन्धयात धाःसा निलम्बन याःगु खः ।अमेरिकी रक्षा मन्त्रालयया तथ्यांक कथं आः नं थ्यंमथ्यं ८९८० म्ह ट्रान्सजेन्डरत सेनाय् सक्रिय दु ।

बिबिसीं धाःकथं थ्व मुद्दाय् कानुनी लडाइ न्ह्याना हे च्वनी तिनि । आः जूगु फैसला सर्वोच्च अदालतय् न्ह्यानाच्वंगु छगू कारवाही जक खः, सर्वोच्च थ्व बारे थःपिनिगु राय न्यंकूगु मदुनि । सर्वोच्चया थ्व फैसला लिपा वइगु चुनावय् राष्ट्रपति पदया उम्मेदवारी दावी यानाच्वंम्ह डेमोक्रेट्सया सांसद कमला ह्यारिसं छगू ट्विट यासें ट्रान्सजेन्डरतय्के सेनाय् च्वनाः देय्या सेवा यायेगु साहस दु व थुकिया निंतिं उपिं योग्य नं दु धासें थुकिया विरुद्ध कानुनी लडाइँ ल्वाये माः धाःगु दु ।