आदिवासी हक अधिकार बारे अन्तर्क्रिया
यल (नेपालभाषा टाइम्स) – नेवाः देय् दबू स्वनिगः विशेष प्रदेशया ग्वसालय् आदिवासी जनजातिया हक अधिकारया विषयय् छगू अन्तर्क्रिया ज्याझ्वः जुल । थनया क्वपुंद्वँय् च्वंगु प्रतिभा समाजया सातोआकी स्मृति सभाकक्षय् जूगु अन्तक्र्रियाय् मू वक्ताकथं नेवाः देय् दबूया सल्लाहकार डा. पुष्पराज राजकर्णिकार झायादीगु खः ।
अन्तर्क्रियाय् नवासें डा. राजकर्णिकारं विश्वय् उपनिवेश व साम्राज्यावादं थीथी जाति, जनजातिया कला, संस्कृति, म्हसीकालिसें भाषायात नं न्हंका छ्वयेगु क्रम जारी जुइवं संयुक्त राष्ट्रसंघ लगायतया थीथी संघसंस्था व निकायं आदिवासी जनजातिया अधिकार संरक्षण यायेमाःगु स्वीकार यानाः निक्वःगु विश्वयुद्ध लिपा बल्ल आदिवासी हक अधिकार सुनिश्चित यानाः अन्तर्राष्ट्रिय आदिवासी दिवस हनेगु चलन हःगु खः धयादिल ।
जल, जमिन व जंगलय् न्हापांगु अधिकार स्थानीय रैथाने आदिवासी जनजातिया दइ धइगु खँयात आईएलओ १६९ पाखें स्वीकार यायेधुंकाः आत्मनिर्णय सहितया आदिवासी हक अधिकार चूलाःगु खँ कनादिसें वय्कलं उकियात नेपाल सरकारं नं अनुमोदन यायेधुंकूगुलिं आदिवासी जनजातिया संघसंस्थानिसें जातीय खलः, पुचःतय्सं नं सक्रिय रुपं दबावमूलक ज्या यानाः उकियात लागू याकेगु स्वयेमाः धयादिल ।
देय् दबूया न्वकु उमेश स्थापितं संविधानय् अधिकार बियातःगु जूसां आः दुगु अधिकार मगाःनि धासें थप अधिकार चूलाकेगु नापं प्राप्त अधिकारयात व्यवहारय् छ्यलेत व्यापक जनदबाव तसकं आवश्यक जूगु स्पष्ट यानादिल ।
देय् दबूया नायः रश्मिला प्रजापतिं देय् दबूया संगठनात्मक संरचनायात कयाः प्रशिक्षण बियादीगु ज्याझ्वः देय् दबू स्वनिगः विशेष प्रदेशया नायः नविन थेच्वमिया जूगु खःसा वरिष्ठ न्वकु गणेशमान श्रेष्ठं सहजीकरण यानादीगु खः ।
LEAVE YOUR COMMENTS