मन्त्रिपरिषद् पुनर्गठन यायेगु तयारी !
अर्थमन्त्रीइ विदूषी राणाया चर्चा, तर अर्थमन्त्री महिलीगु सम्भावना अप्वः
येँ (नेपालभाषा टाइम्स) – सरकार गठन जूगु सछिन्हु पूवंगु छुं न्हि लिपा हे मन्त्रिमण्डल पुनर्गठनया तयारी न्ह्याःगु चर्चा सुरु जूगु दु । प्रधानमन्त्री बालेन साह मन्त्रिमण्डलय् च्वंपिं छुं मन्त्रीतय् ज्या खनाः असन्तुष्ट दुगुलिं मन्त्रिमण्डल पुनर्गठन यायेत्यंगु खँ धाःगु दु ।
प्रधानमन्त्री साहं मेगु वालय् तक दुने मन्त्रिमण्डल पुनर्गठन यायेगु कथं ज्या न्ह्याकूगु खँ पिहांवःगु दु । थुकियात कयाः सरकारया सचिव, सहसचिव लिसें मन्त्रीतय् सचिवतय् दथुइ चर्चा व्यापक जुइधुंकूगु दु । प्रधानमन्त्री साहं छुं न्हि न्ह्यः सत्तारुढ दल रास्वपाया सभापति रवि लामिछानेयात वय्कःया छेँ बुढानिलकण्ठय् हे वनाः नापलासें छुं मन्त्रीतय् ज्यायात कयाः असन्तुष्टि प्वंकूगु खः । थ्व असन्तुष्टि लिपा म्हीग सभापति लामिछानें धौख्यःया छगू रिसोर्टय् वनाः पार्टी उपसभापति लिसें अर्थमन्त्री स्वर्णिम वाग्लेलिसे सहलह यानादीगु खः । थ्व सहलह लिपा आः मन्त्रिमण्डल पुनर्गठन यायेगु तयारी जूगु चर्चा तच्वयेवं उगु बैठकय् मन्त्रीत हिलेगु बारे हे खँल्हाबल्हा जूगु अनुमान यानाहःगु खः ।
प्रधानमन्त्री साहं ला अर्थमन्त्री स्वर्णिम वाग्लेयात चिइकेगु बारे सभापति लामिछानेलिसे खँ ल्हाःगु चर्चा जुयाच्वंगु दु । उकिं थौंकन्हय् आः उद्योगी व्यापारी विदुषी राणा अर्थमन्त्री जुइगु चर्चा तच्वयाच्वंगु दु । तर लामिछानें अर्थमन्त्रीयात हे चीकेत स्वीकृत बिल जुइ धयागु खँय् धाःसा यक्वसिया शंका हे दु ।
मेपिं मन्त्रित चीकूसां प्रधानमन्त्रीं अर्थमन्त्री चीकेमफइगु चर्चा नं जुयाच्वंगु दु । अर्थमन्त्री चीकल धाःसा प्रधानमन्त्री साहया सल्लाहकारतय् टिम नं हिलेमालीगु जुइ । सभापति लामिछानें साह नापया खँल्हाबल्हाय् प्रधानमन्त्रीया सल्लाहकारतय् ज्यायात कयाः असन्तुष्टि प्वंकूगु खः । उकिं अर्थमन्त्री चीकीगु सम्भावना धाःसा म्हो हे जक दुगु खँ सूत्रं धाःगु दु । छाय्धाःसा प्रधानमन्त्रीं थःगु सल्लाहकारतय् टिम चीकीगु सम्भावना मदु ।
साह येँ महानगरपालिकाया मेयर जुयाच्वंगु इलं निसें हे थुगु टिमं हे ज्या याना वयाच्वंगु दु, अले थ्व टिमया हे सक्रियतां साह प्रधानमन्त्री तक जुइत ताःलाःगु खः । उकिं सल्लाहकार टिम चीकीगु सम्भावना मदुगुलिं अर्थमन्त्री नं महिलीगु सूत्रया दावी दु ।
प्रधानमन्त्री साहं अर्थमन्त्री वाग्ले लिसें स्वास्थ्य तथा खाद्य स्वच्छा मन्त्री निशा मेहता, सूचना तथा संचार मन्त्री डा. विक्रम तिमिल्सिना, कृषि वन तथा पर्यावरण मन्त्री गीता चौधरी व उद्योग, वाणिज्य तथा आपूर्ति मन्त्री गौरी कुमारीयात चीकीगु खँ दु ।
LEAVE YOUR COMMENTS