ने. सं. ११४६ दिल्लागा षष्ठी -

ट्रम्पया ख्याच्वः : इरानयात ‘अन्तिम अवसर’

बीबीसी – अमेरिकी राष्ट्रपति डोनाल्ड ट्रम्पं इरानलिसे वार्ता जुयाच्वंगु दाबी यासें तेहरानयात सम्झौता यायेगु निंतिं ‘अन्तिम अवसर’ जूगु ख्याच्वः बिउगु दु ।

ह्वाइट हाउसय् सोमवाः पत्रकारतलिसे खँ ल्हासें राष्ट्रपति ट्रम्पं साउदी अरेबिया, युएइ, कतारलिसे क्षेत्रीय देय्तय्गु इनापय् इरानलिसे वार्ता जारी याना तयेत सहमत जुयागु धाःगु दु । राष्ट्रपति ट्रम्पं इरानं अस्वीकार याःसां निगुलिं पक्ष दथुइ वार्ता जुयाच्वंगु दाबी यासें तेहरानयात दस्तावेजय् ल्हाःचिं तयेगु निंतिं अन्तिम अवसर बियागु खँ धाःगु दु ।

ट्रम्पयाकथं वार्ताया मुख्य उद्देश्य होर्मुज जलमार्ग हाकनं संचालय् हयेगु व इरानया आणविक ज्याझ्वःयात निःशस्त्रीकरणपाखे यंकेगु खः । ट्रम्पं होर्मुज जलमार्ग याकनं हे चालीगु सम्भावना दुगु तर आणविक निःशसस्त्रीकरण प्रक्रियाया कारणं छुं ई काये फइगु नं धाःगु दु ।

मेखे इरानं वासिङ्टनलिसे प्रत्यक्ष वार्ता यानाच्वंगु धकाः याःगु दाबीयात अस्वीकार यासे थःपिंसं होर्मुज जलमार्गयात सुरक्षित जलमार्ग सुनिश्चित यायेगु विषयय् ओमानलिसे खँल्हाबल्हा यानाच्वनागु धाःगु दु ।

इरानया विदेश मन्त्रालयया प्रवक्ता इस्माइल बाघाईं अमेरिका व इरान दथुइ प्रत्यक्ष वार्ता जुयामच्वंगु स्पष्ट याःगु दु । बाघाईं ओमानलिसे होर्मुज जुयाः सुरक्षित रुपं वये वने यायेगु व्यवस्थाया बारे सहलह जुयाच्वंगु धाःगु दु । होर्मुज तत्काल खुले मजुइगु नं बाघाई स्पष्ट याःगु दु ।