फोटोग्राफी व भिडियो पत्रकारिता तालिम क्वचाल
येँ (नेपालभाषा टाइम्स) – येँ महानगरपालिकां चलचित्र विकास बोर्डलिसेया सहकार्यय् न्ह्याकूगु लछियंकंया फोटोग्राफी व फोटो भिडियो पत्रकारिता क्वचाःगु दु । येँ महानगरपालिकां ‘रोजगारी व आय वृद्धि, येँदेय्या समृद्धि’ व ‘रचनात्मक सहर’ ज्याझ्वः अन्त्र्गत बोर्डलिसेया सहकार्यय् उगु तालिम संचालन याःगु खः ।
तालिम समापनय् येँ महानगरपालिकाया कार्यवाहक प्रमुख सुनिता डंगोल व बोर्डया अध्यक्ष दिनेश डिसीं संकिपा ख्यःया न्हापां स्टिल फोटो पत्रकार मञ्जु श्रेष्ठ, स्टिल फोटोपाखें पोष्टर सिर्जना यानादीम्ह सुन्दर श्रेष्ठयात म्हतिं स्वीन्याद्वः तका दांलिसें हनेज्या यानादीगु खः । अथे हे तालिमया प्रशिक्षकपिंत नं प्रशंसापत्र व प्रशिक्षार्थीतय्त दसिपौ लःल्हानादिल ।
ज्याझ्वलय् नवासें कार्यवाहक प्रमुख डंगोलं तालिमय् ब्वति कयादीपिनिगु प्रशिक्षण क्वचायेधुंकूगु व आः व्यावसायिक यात्रा शुरु जूगु दु धासें थःपिंसं प्राप्त यानादीगु ज्ञान, सिप व क्षमतायात स्वरोजगार व रोजगारलिसे स्वानाः आय आर्जन यायेगु स्वयेमाः धयादिल । ‘जिमिसं बियागु थ्व तालिम, सोनया निंतिं मखु, थ्वपाखें व्यक्तिया आय आर्जनय् तिबः जुइमा धकाः खः’, कार्यवाहक प्रमुख डंगोलं धयादिल, ‘स्वनिगलय् आपालं बांबालाःगु थाय् दु, अन थ्यनाच्वंपिं सकसिनं अनया बांलाःगु थाय्या किपा कायेगु विन्दु गन खः धइगु सियाच्वंगु दइमखु । आः छिकपिंसं अज्याःगु थाय् जिमित सिफारिस यानादिसँ, जिमिसिं अज्याःगु थासय् किपा कायेगु थाय्या रुपय् संकेत चिंपाखें पहिचान बीगु जुइ ।’
येँ महानगरपालिकां रचनात्मक सहर ज्याझ्वः अन्तर्गत संचालन याःगु ज्याझ्वःत दिगो प्रभाव लाकीकथंया जूगु व थ्व तालिम नं उकिया हे छगू श्रृंखला खः धासें बोर्डया अध्यक्ष डिसीं धयादिल, ‘महानगरपालिकां न्ह्यःने न्ह्याकूगु संकिपा ख्यःलिसे सम्बन्धित ज्याझ्वलय् बोर्ड न्ह्याबलें छगू हे थासय् दइ ।’
तालिमया प्रशिक्षकलिसें वरिष्ठ फोटोग्राफर राजभाई सुवालं फोटोग्राफी व भिडियोग्राफीया निरन्तर अध्ययन यानाच्वनेमाःगु विषय जूगु खँय् बः बियादिसें भिंगु व बांलाःगु ज्याया शुरुवात जूगु दु धयादिल ।
तालिमय् स्वीन्याम्ह प्रशिक्षार्थीतय् सहभागिता दुगु खः ।
LEAVE YOUR COMMENTS