भारतं पाकिस्तानय् आक्रमण यायेफु

एजेन्सी- पाकिस्तानी प्रधानमन्त्री इमरान खानं भारतय् नागरिकत संशोधन विधेयकयात कयाः जुयाच्वंगु प्रदर्शनयात मत्थर यायेगु निंतिं पाकिस्तानय् सैन्य आक्रमण जुइफुगु खँ धाःगु दु । भारतय् थौंकन्हय् नागरिकता संशोधन विधेयकयात कयाः तच्वःगु प्रदर्शन जुयाच्वंगु दु । थ्व प्रदर्शनपाखें नागरिकतय् ध्यान भत्के यायेगु निंतिं पाकिस्तानय् आक्रमण यायेफुगु आशंका प्रधानमन्त्री खानं प्वंकूगु खः ।

प्रधानमन्त्री खानं छगू ट्विट यासें भारतय् विरोध प्रदर्शन अप्वयाच्वंगु इलय् पाकिस्तानय् नं खतरा अप्वः धासें भारतीय सेना प्रमुखया धापुतिं नं थुकिया पुष्टि जूगु खँ धाःगु खः । भारतीय सेनाप्रमुख जनरल विपिन रावतं वंगु बुधवाः काश्मिरया भारत–पाकिस्तान सीमाया अवस्थाय् छुं नं इलय् हिलेफु धासें थज्याःगु अवस्थाय् भारतीय सेना तयार दुगु खँ धयादीगु खः । खानं च्वःगु दु, ‘भारतीय सेनां काश्मिरयात कैद यानातःगु दु व जब थ्व प्रतिबन्ध चिइकी, अबले रक्तपात जुइगु आशंका दु । भारतय् जुयाच्वंगु विरोध प्रदर्शनं पाकिस्तानयात खतरा अप्वःगु दु व भारतीय सेना प्रमुखया धापुतिं थ्व चिन्तायात पुष्टि याइ ।’

खानं भारतीय प्रधानमन्त्री नरेन्द्र मोदी सरकारं भारतयात हिन्दू राष्ट्र दयेकेत चाहे जुयाच्वंगु द्वपं नं बियादीगु दु । वय्कलं भारतं हिन्दू राष्ट्रवादया भावना अप्वयेका आन्तरिक विरोधयात मत्थर यायेत छुं कथंया कारवाही यात धाःसा पाकिस्तानया न्ह्यःने उकिया लिसः बिइगु बाहेक मेगु विकल्प दइमखु धाःगु दु ।