महान फुटबल कासामि पेलेया मंत, ब्राजिलय् स्वन्हु राष्ट्रिय शोक

एजेन्सी- विश्वया नांजाःम्ह ब्राजिलया फुटबलया कासामि पेले (एड्सन आरान्तेस दो नासिमेन्तो) या ८२ दँया उमेरय् निधन जूगु दु । ब्राजिलया साओ पालोय् च्वंगु अस्पतालय् वासः याकाच्वंम्ह पेले बिहिवाः चान्हय् मदुगु खः । क्यान्सरया ल्वचं कयाच्वम्ह पेलेया किड्नी नं समस्या जुयाच्वंगु खः ।

सन् २०२१ य् पेलेया प्वाथं ट्युमर लिकाःगु खःसा व धुंकाः निरन्तर वासः जुयाच्वंगु खः । लछि न्ह्यःनिसे ल्वय् तच्वः जुया वयेवं पेलेयात अस्पतालय् भर्ना यानाः वासः यानाच्वंगु खः । पेलेया म्ह्याय् केलि नासिमेन्तों सामाजिक सञ्जाल मार्फत पेलेया स्वास्थ्यया अपडेट बियावयाच्वंगु खःसा बिहिवाः केलिं पेलेया मदुगु जानकारी बिउगु खः । अस्पतालं नं थुकीया पुष्टि याःगु खः ।

पेले मदयेधुंकाः पेलेया ट्विटर एकाउन्टं पोस्ट यासें च्वःगु दु, ‘प्रेरणा व मतिनां जाःम्ह जुजु पेलेया यात्रा शान्तिपूर्वक क्वचाल, मतिना, मतिना व मतिना, न्ह्याबलें ।’

पेलेया निधन लिपा ब्राजिलं स्वन्हु राष्ट्रिय शोक याइगु जूगु दु । पेलेया पूर्व क्लब सान्तोसं बिउगु जानकारीकथं सोमवाः पेलेया शवयात अस्पतालं कफिनय् तयाः पितहइगु व क्लबया मैदानय् सर्वसाधारणयात अन्तिम श्रद्धान्जली बिइत तइ । मंगलवाः पेलेया शव यात्रा जुइगु व व धुंकाः अन्तिम संस्कारया निंतिं परिवारयात लःल्हाइ ।

पेले १५ दँ दुबलय् ब्राजिलया चर्चित क्लब सान्तोसं म्हितूगु खःसा व धुंकाः पेलें मेगु क्लबं मम्हितू । पेले १६ दँ दुबलय् ब्राजिलया निंतिं डेब्यु कासा म्हितूगु खः– अर्जेन्टिना विरुद्ध । १७ दँ दुबलय् विश्वकपया उपाधि त्याकूम्ह पेले ब्राजिलया निंतिं स्वक्क विश्वकप त्याकूगु दु । पेलें सन् १९५८, १९६२ व १९७० या विश्वकपया उपाधि त्याकूगु खः । पेले ब्राजिलया निंतिं ९२ गू कासा म्हिताः ७७ गोल याःगु दु ।
विश्वय् दकलय् अप्वः गोल याःगु कीर्तिमान नं पेलेया नामय् दु । पेलें मुक्क १३७६ गू कासा म्हिताः १२८३ गोल याःगु दु । सन् २००० य् फिफां पेलेयात ‘प्लेयर अफ द सेन्चुरी’या उपाधि बिउगु खः ।

पेलेया निधन लिपा विश्वया शीर्ष नेता, कासामि, फुटबल क्लब, फिफां श्रद्धाञ्जली बिउगु दु । ब्राजिलया राष्ट्रपति जायर बोलसनारो, अमेरिकी राष्ट्रपति जो बाइडेन आदि शीर्ष नेतातय्सं सामाजिक सञ्जाल मार्फत पेलेयात श्रद्धान्जली बिउगु दु ।

फुटबलया सर्वाेच्च निकाय फिफा, युइएएफ, ब्राजिल फुटबल संघं नं पेलेयात श्रद्धाञ्जली बिउगु दु । विश्वया नांजाःपिं फुटबल कासामिपिं लियोनल मेसी, नेयमार, क्रिष्टियानो रोनाल्डो, ह्यारी केन, केलियन एमबाप्पें नं पेलेयात लुमंकाः श्रद्धान्जली बिउगु दु ।

सम्बन्धित बुखँ

LEAVE YOUR COMMENTS