ओली व दाहालया सहमतिइ : माधव नेपालया असन्तुष्टि
येँ (नेपालभाषा टाइम्स) – नेपाली कम्युनिष्ट पार्टीया संयोजक पुष्पकमल दाहालं नेकपा एमालेया अध्यक्ष केपी शर्मा ओली लिसे प्रदेश सरकार नीस्वनेगु व संचालन बारे लिखित सहमति यायेवं सहसंयोजक माधव नेपाल तंचाःगु दु । ओलीयात नापलाः वनेगु झ्वलय् संयोजक दाहालं सहसंयोजक नेपालयात प्रदेश सरकार नीस्वनेगु बारे सहलह जक यायेगु सहमति यायेमखु धकाः धाःगु खःसा आः आकाझाकां सहमति याःगु खँय् नेपालं असन्तुष्टि प्वंकूगु खँ सूत्रं धाःगु दु । संयोजक दाहालं आकाझाकां सहमति यायेवं नेपाल तंचाःगु खः । सूत्रयाकथं दाहालया उगु पलाखं पार्टी दुने गम्भीर राजनीतिक असन्तोष ब्वलंगु दु ।
सूत्रं धाःगु दु, ‘सामान्य राजनीतिक सहलहया निंतिं ओलीयात नापलायेत वंम्ह संयोकज दाहालं आकाझाकां प्रदेश सरकारया भागबन्डा यानाः लिखित सम्झौता यानादीगु दु । अनावश्यक रुपय् सत्तामाह खनेदइकथं दाहालं ओलीलिसे याःगु थ्व सम्झौतां गुगुं नं दृष्टिकोणं पार्टीया भिं याइ मखु । ओलीयात नापलाः वने न्ह्यः दाहाल व नेपाल दथुइ सहलह जूगु खः । उगु इलय् नेपालं कांग्रेसलिसे अझ सहलह ब्याकाः सहमतिया सूत्र मालेमाःगु, आःया अवस्थाय् ओलीलिसे सम्बन्ध स्वानाः कांग्रेसयात तापाके मजिउगु व उकिं देय्या निंतिं हे प्रत्युपादक जुइगु खँ नेपालं धयादीगु खः । लिसलय् दाहालं ओलीलिसे थप सहलह यायेगु धकाः धाःगु खः ।
दाहालं ओलीलिसे सहमति यायेवं नेता नेपाल जक मखु नेकपाया आपालं नेतृत्व दाहाललिसे तंचाया च्वंगु नं सूत्रं धाःगु दु । सूत्रं धाल, ‘म्हिगःया एकीकृत समाजवादी वृत्त जक मखु माओवादी वृत्त नं लय्ताःगु मदु ।’ सूत्रयाकथं नेकपाया आपालं नेतातय्सं दाहाल–ओली दथुइ जूगु सहमतियात कयाः असन्तुष्टि प्वंकेगु ज्या जुयाच्वंगु दु ।
वंगु शनिवाः अध्यक्ष ओली व संयोजक दाहाल दथुइ न्यागू प्रदेशय् सरकार नीस्वनेत स्वंगू बुँदाया समझदारी यानाः ल्हाःचिं तयेगु ज्या जूगु खः । सहमतिकथं नेकपा एमालें कोशी, बागमति व लुम्बिनी प्रदेशय् मुख्यमन्त्री कायेगु व नेकपायात कर्णाली व सुदूरपश्चिमय् मुख्यमन्त्री कायेगु सहमति जूगु खः ।
थ्वहे झ्वलय् नेकपाया नेता राजेन्द्र श्रेष्ठं प्रदेशय् सरकारविहीन अवस्था मवयेमा धकाः संयोजक दाहालं एमाले लिसे सहमति यानादीगु खँ ‘नेपालभाषा टाइम्स’ यात कनादीगु दु । नेकपा सरकारय् वनेत लालयित जूगु मखसे निकास बीगु निंतिं जक सहमति याःगु धासें वय्कलं धयादिल, ‘नेकपां ला कांग्रेस व एमाले मिले जुयाः सरकार चले याः धकाः धयागु खः । तर कांग्रेस उकिया निंतिं तयार मजुल । कांग्रेस दुने नं थौंकन्हय् निगू गुट दु, देउवा गुट व गगन गुट उमिसं नं सरकारय् वनेगु स्वयां नं पार्टी दुने हे मिले यायेगु कुतः यानाच्वंगुलिं नं सरकारय् ध्यान मतःगु खः ।
दाहालया थुगु पलाः जक मखसें अभिव्यक्तिइ नं विरोधाभास खने दुगुलिं पार्टी दुने अझ असन्तुष्टि अप्वया वनाच्वंगु धाःगु दु । वंगु साउन ८ गते पुष्पलाल स्मृति दिवसया झ्वलय् ग्वसाः ग्वःगु ‘वर्तमान राजनीतिक परिस्थितिइ वामपन्थी दलतय्गु भूमिका’ विषयक विचार गोष्ठीइ दाहालं सरकार दयेकेगु व क्वःथलेगु कासाय् वन धाःसा दने हे मफक क्वःदइगु ख्याच्वः बियादीगु खः । तर उगु अभिव्यक्ति बिउगु छन्हु लिपा हे ओलीलिसे प्रदेश सरकार नीस्वनेगु निंतिं सहमति यायेवं पार्टी पंक्ति असन्तुष्टि जूगु खः ।
बजेट दयेकेगु झ्वलय् ब्वलंगु असमझदारी, बजेट विहीनताया स्थिति व अस्वस्थ राजनीतिक प्रतिस्पर्धा अन्त्य यासें प्रादेशिक विकास व सुशासनयात तीव्रता बीत सहमति यानागु खँ निगुलिइ पक्षं धाःगु दु ।
LEAVE YOUR COMMENTS