ने. सं. ११४४ कौलाथ्व पारू - नःलास्वनेगु

कोरोना भाइरस : छाय् यक्व ल्याय्म्हत संक्रमित जुयाच्वन ?

एजेन्सी- कोरोना भाइरसया कारणं बन्दाबन्दीया अवस्थाय् लानाच्वंगु आपालं देय्त खुल्ला जुयावनेवं यक्व ल्याय्म्हत संक्रमित जूगु केसत लुयावःगु दु ।

आपालं देशय् तयातःगु लकडाउन व निषेधाज्ञा फुकुवा जुइवं हलिन्यंकया थीथी थाय्या ल्याय्म्हतय्त अप्व संक्रमण खनेदुगु दु । फेब्रुअरी निसें जुलाई तकया अवधिया दुने ५ निसें २४ दँया मनूतय् संत्रमणया दर अप्वःगु खनेदु । ६० लख संक्रमिततय् तथ्यांक मुंकाः याःगु छगू अनुसन्धानं थज्याःगु डाटा लुइकूगु खः ।

५ निसें १४ दँया मस्तय् तथ्यांक ०.८ प्रतिशतं अप्वया ४.६ प्रतिशत थ्यंगु दु । अथेहे १५ निसें २४ दँया मनूतय् तथ्यांक ४.५ अप्वया १५ प्रतिशत थ्यंगु दु ।

विश्व स्वास्थ्य संघया कोभिड-१९या प्राविधिक अधिृकत मारिया भान केरकोभया कथं महामारी ल्याय्म्हतय् दथुइ अप्वया वनाच्वंगु खँ तसकं चिन्ताया विषय खः । ‘ल्याय्म्हतय्त तसकं सामान्य लक्षण व लक्षण खनेमदु, ल्याय्म्हतय् निंतिं व बांलागु खँ खः । तर आपालं ल्याय्म्हत बुरा-बुरी व कमजोर मनूत नाप च्वनाच्वंगु दइ । अप्व ल्याय्म्हत संक्रमित जुइगु धाइगु उमिसं बुरा-बुरी वा कमजोरतय्त उगु ल्वय् सरे यायेफइ गुकीं यानाः मनूत सीफइगु तकं अवस्थाय् वयेफु,’ मारियां धयादी ।

थज्याःगु तथ्यांक हिलावनाच्वंगु आपालं कारण दुगु खँ न्ह्यथनादिसें मारियां धयादी, ‘छगू मू कारण लकडाउन फुकुवा जुइवं मनूत न्हापा थें सामान्य जीवनशैलीइ लिहांवंगुलिं खः ।’

‘समाज खुल्ला जुइवं मनूतय् स्वाभवय् नं हिउपा वल । अप्व मनूत पिहांवनेगु शुरु यात । अफिसया ज्या, सामाजिक ज्याय् वनेगु यात गुकीं यानाः झीगु स्वभावय् हिउपा वल । थुकीं यानाः अप्व ल्याय्म्हतय्त भाइरस सरे जुइगु सम्भवना दत,’ वय्कलं धयादिल ।

मेगू छताः कारण धाइगु ल्वचं कःपिनि निगरानी यायेगु तरिका खः । न्हापा जूसा लक्षण दुपिं व अवस्था तसकं नाजुक जूपिं जक मालेगु ज्या जुल । थौंकन्हय् टेस्ट यायेगु व्यापक जुल अले लक्षण मदुपिंत नं संक्रमण जूगु धकाः खनेदत ।

विश्व स्वास्थ्य संघया कोभिड-१९या प्राविधिक अधिृकत मारिया भान केरकोभं ल्याय्म्हतय्त भाइरसपाखें बचेजुइगु निंतिं सावधानी नालाकायेत सुझाव नं बियादी । वय्कलं भौतिक दुरी कायम यायेगु, बरोबर ल्हाः सिलेगु, मास्क तयेगु नापं स्वंगः ‘सी’ या पालना यायेत इनाप यानादीगु दु । वय्कलं धयादीगु स्वंगः ‘सी’ अर्थात क्राउडय् मवनेगु (भिडभाडय् मवनेगु), क्लोज्ड स्पेशय् मच्वनेगु (बन्द थासय् मच्वनेगु) व क्लोज कन्ट्याक्ट (सतिक सम्पर्क) य् मवनेगु ।