
येँ – भारतया सिक्किमय् लछियंकं नेवाः भाय् स्यनेगु प्रशिक्षण शुरु जूगु दु । सिक्किमया सिङ्तामय् स्थानीय नेवाःतय् दथुइ थ्व कक्षा शुरु याःगु खः । सिङ्तामया नेवाः भाय् ब्वनेकुथिया ग्वसालय् जूगु उगु नेवाः भाय्या कक्षाय् सिङ्ताम व जःखः च्वंपिं नापं यानाः ४६ म्ह ब्वँमितय्सं ब्वति कयाच्वंगु दु ।
थ्व कक्षा ज्याय् वनेमाःपिं मनूतय् लागिं सनिलय् व मेपिनि लागिं सुथय् यानाः निगू शिफ्ट सञ्चालन यानाच्वंगु दु ।
कक्षाया उलेज्या समारोहय् वरिष्ठ समाजसेवी देवकुमारी प्रधान मूपाहां कथं झाःगु खःसा शान्तिनगर गाउँ सुधार समितिया नायः कृष्ण क्षेत्री विशेष पाहां कथं झाःगु खः ।
नेवाः भाय् विभागया प्रमुख विकास प्रधानं तयार यानादीगु लछियंकंया कोर्शया आधारय् प्यम्ह शिक्षिकापिं मीना प्रधान, तारा प्रधान, बबिता प्रधान व निर्मला प्रधानपिंसं भाय् स्यनाच्वंगु दु । वय्कःपिं प्यम्हं येँय् वयाः नेवाः भाय्, कला व संस्कृति बारे कक्षा कयाः सयेका वंपिं खः ।
भाय् ब्वनेकुथिया सचिव अजित प्रधानं लसकुस यासें न्ह्याकूगु उगु ज्याझ्वलय् संयोजक विकास प्रधान, प्रशिक्षक लिसें नेवाः सिक्किम हेराल्डया सम्पादक मीना प्रधानपिंसं नेवाः भाय् व नेवाः संस्कृति सयेकाः न्ह्यःने न्ह्याः वनेगु थ्व छगू अवसर खः धयादिल ।
ज्याझ्वलय् ब्वनेकुथिया नायः विनोद प्रधान, सल्लाहकार एलएन प्रधानपिंसं नं नुगःखँ तसें थ्व ग्वसाःपाखें सिक्किमया नेवाःतय्सं लाभ काये फइगु बिचाः तयादिल । थ्व कक्षाय् इच्छुकपिं सुं नं मनुखं दथुइ कक्षाय् च्वने फइगु व्यवस्था याःगु दु । सिक्किमया थःगु हे जनशक्ति छ्यलाः लछियंकं नेवाः भाय् स्यनेगु कक्षा सञ्चालन जूगु थ्वहे न्हापांखुसी खः ।
LEAVE YOUR COMMENTS