बागमति प्रदेशय् सरकार गठनया निंतिं दलतय् सहलह तीव्र
येँ (नेपालभाषा टाइम्स) – बागमति प्रदेशय् न्हूगु सरकार गठनया निंतिं दलतय्सं सहलह तीव्र रुपं न्ह्यःने यंकूगु दु । बागमति प्रदेशय् न्हूगु सरकार गठनया निंतिं नेकपा (एमाले) व नेपाली कम्युनिष्ट पार्टी दथुइ सत्ता साझेदारीया सहमति यायेधुंकूगु दु ।
सरकार गठनया निंतिं निगू प्रमुख दलया दथुइ सत्ता साझेदारी जुइधुंकूगु अवस्थाय् आः मेमेगु दलतसे नं सहलह न्ह्यःने न्ह्याकूगु खः । सरकार गठनया निंतिं राष्ट्रिय प्रजातन्त्र पार्टी, हाम्रो नेपाली पार्टी व नेपाल मजदुर किसान पार्टीलिसे सहलह जुयाच्वंगु नेकपा एमाले बागमति प्रदेशया संसदीय दलया प्रमुख सचेतक एकलाल श्रेष्ठं कनादीगु दु ।
‘सरकार गठनया निंतिं मेमेगु दलतलिसे नं सहलह तीव्ररुपं न्ह्यानाच्वंगु दु’, प्रमुख सचेतक श्रेष्ठं धयादिल, ‘न्हूगु सरकार गठनया गतिरोध याकनं क्वचायेकेकथं सहलह न्ह्यःने न्ह्याः वनाच्वंगु दु ।’
थुखे न्हूगु सरकार गठनया गतिरोध अन्त्य यायेत मुख्यमन्त्री इन्द्र बानियां नं दक्वं दललिसे सहलह यानाच्वंगु नेपाली कांग्रेस बागमति संसदीय दलया प्रमुख सचेतक पुकार महर्जनं कनादीगु दु ।
कांग्रेस नेतृत्वया सरकारयात बियातःगु समर्थन लित कासें नेकपा (एमाले) बागमति प्रदेश सरकारं पिहां वयेधुंकूगु दु । सरकारं पिहां वयेखतं एमाले व नेकपा दथुइ सहकार गठनया निंतिं सहमति जूगु खः ।
सरकार गठनया निंतिं आवश्यक बहुमत मगाःगुलिं न्हूगु सरकार गठन याये फयाच्वंगु मदु । ११० म्ह सदस्य दुगु बागमति प्रदेशय् लिपांगु इलय् थीथी कारणं १०४ म्ह सदस्य दुसा सरकार गठनया निंतिं ५३ म्ह सांसदया समर्थन आवश्यक जुइ । एमाले व नेकपां मेगु दलया समर्थन कयाः सरकार गठनया कुतः यानाच्वंगु दु ।
LEAVE YOUR COMMENTS