पाकिस्तानयात द्वपं मबीत ख्याच्वः

पाकिस्तानी सेनां भारत प्रशासित काश्मिरय् जूगु आतंकवादी आक्रमणय् पाकिस्तानयात जबर्जस्ति द्वपं बियाच्वंगु धासें कडा प्रतिक्रिया बिउगु दु । पाकिस्तान सेनाया प्रवक्ता मेजर जनरल आसिफ गफूरं शुक्रवाः छगू पत्रकार सम्मेलन यासें थ्व आक्रमण भारतया आन्तरिक सुरषा व्यवस्था कमजोर जुयाः जूगु धासें भारतीय सुरक्षा व्यवस्थाप्रति हे न्ह्यसः चिं थनादीगु दु ।

वंगु फेब्रुअरी १४ य् भारतीय अर्धसैनिक बल सीआरपीएफया जवानत च्वना वनाच्वंगु गाडीइ विस्फोटक पदार्थ जायेकाहःगु छगः कार न्याके यंकाः जैश ए मोहम्मद नांया आतंकवादी संगठनं आत्मघाती आक्रमण याःगु खः । थ्व आक्रमणय् ४० म्हं मल्याक सीआरपीएफया जवानत सीगु खः ।भारतं थ्व घटनाय् पाकिस्तनया ल्हाः दुगु द्वपं बिया वयाच्वंगु दु ।

पाकिस्तानं धाःसा थ्व द्वपंयात अस्वीकार याना वयाच्वंगु दु । पाकिस्तानी सेना प्रवक्ता गफूरं पत्रकार सम्मेलनय् धाःगु दु, ‘थ्व घटना जुइगु पाकिस्तानं आक्रमणयात कयाः बांलाक सोचबिचाः यानाः छानविन याःगु खः, अले जिम्मेवार सरकारया रुपय् प्रतिक्रिया बिउगु खः । पाकिस्तानया प्रधानमन्त्रीं भारतयात न्हापा गबलें मबिउगु कथंया प्रस्ताव बिउगु दु ।

वय्कलं धयादीगु दु यदि प्रमाण दत धाःसा सुयागुं दबाबय् मखु, थःपिनिगु हे स्वार्थया निंतिं अज्याःगु समूहविरुद्ध कारवाहश्र यायेगु जुइ ।’
प्रवक्तां धाःगु दु ‘जिमिसं जाँचबुझ यानाः जक प्रतिक्रिया बियागुलिं छुं लिबाःगु खः, तर जिमिसं यानागु जाँचबुझं पाकिस्तानयात बियाच्वंगु द्वपं आधारहिन खनेदुगु दु ।’

थ्व झ्वलय् प्रवक्ता गफूरं यदि भारतपाखें छुं कारवाही जुल धाःसा थःपिंसं नं कडा लिसः बीगु खँ धयादीगु दु । ‘भारतय् पाकिस्तानं युद्धया तयारी यानाच्वन धयागु चर्चा जुयाच्वंगु दु । जिमिसं तयारी यानाच्वनागु मखु, अःखबतं भारतपाखें युद्धया धम्की वयाच्वंगु दु । जिमिसं सुरुवात यायेमखु ।

तर छुं कारवाही जुल धाःसा जिमिसं नं लिसलय् कारवाही यायेगु जुइ । जिमित लिसः बीगु हक दु’ प्रवक्तां धयादीगु दु ।‘जिमिगु लिसः नं बिस्कं हे जुइ, आःया जिमिगु फौज न्हापाया थेंज्याःगु मखु । जिपिं सुयां लिसे ल्वायेत ग्याःपिं मखु’ प्रवक्तां भारतयात ख्याच्वः बिसें धाःगु दु ।