लायन्स क्लब इन्द्रायणीया न्हय्क्वःगु चार्टर
येँ (नेपालभाषा टाइम्स) – लायन्स क्लब अफ काठमाडौ इन्द्रायणी खुसिबुँया न्हय्क्वःगु चार्टर क्वचाल । चार्टरया झ्वलय् इन्द्रायणी खुसिबुँया स्पोन्सरय् चायेकूगु न्हूगु निगू च्याप्टरया उलेज्या यासें दसिपौ व पिन लःल्हाःगु खः ।
इन्द्रायणी खुसिबुँया अध्यक्ष सुमन वाद्य श्रेष्ठया सभापतित्वय् जूगु ज्याझ्वलय् अन्तर्राष्ट्रिय निर्देशक बालकृष्ण बुर्लाकोटी मूपाहांकथं झायादीगु खः । मूपाहां बुर्लाकोटीं त्वाःदेवाय् मत च्याकाः उलेज्या यानादीगु ज्याझ्वलय् लायन्स क्लब अफ काठमाडौं श्री श्वेतकाली नरदेवी व निर्माण शक्ति कृपालुया उलेज्या यासें क्लबया दसिपौ नं लःल्हाःगु खः । उलेज्या याःगु तूलय् मूपाहां बुर्लाकोटी, जिल्ला अध्यक्ष रमेश अधिकारी, चार्टर अध्यक्ष सागर डंगोलं व इन्द्रायणी खुसिबुँया अध्यक्ष श्रेष्ठं हस्ताक्षर यानादीगु खः ।
श्री श्वेतकाली नरदेवी येँ महानगरपालिका १८ वडाया नायः न्हुछेकाजी महर्जनया अध्यक्षताय् नीस्वंगु खःसा निर्माण शक्ति कृपालु शान्तराम बस्नेतया अध्यक्षताय् नीस्वंगु खः । ज्याझ्वलय् न्हूगु नीस्वंगु च्याप्टरया पदाधिकारीपिंत मेडल व पिन नं लःल्हाःगु खः ।
येँ महानगरपालिका १५ वडाया नायः इश्वरमान डंगोल, १८ वडा नायः नवीन मानन्धर, १८ वडा नायः न्हुछेकाजी महर्जनलिसें लायन्स क्लबया थीथी पदाधिकारीपिं उपस्थित दुगु ज्याझ्वलय् लायन्स क्लब अफ इन्द्रायणी खुसिबुँया न्हय्क्वःगु चार्टरया लसताय् केक तानाः लसता हंगु खः ।
LEAVE YOUR COMMENTS