त्रिविइ शिक्षा मन्त्रीविरुद्ध प्रदर्शन

येँ (नेपालभाषा टाइम्स) – त्रिभुवन विश्वविद्यालयया ६७ क्वःगु दिवस हनाच्वंगु इलय् शिक्षा, विज्ञान तथा प्रविधिमन्त्री सस्मित पोखरेल विरुद्ध प्रदर्शन याःगु दु । विश्वविद्यालयया वार्षिक दिवस ज्याझ्वलय् ब्वति कायेत वंम्ह शिक्षा मन्त्री पोखरेल विरुद्ध ल्याय्म्हतय्सं नाराबाजी यासें प्रदर्शन याःगु खः । प्रदर्शनकारीतय्सं विश्वविद्यालयय् राजनीतिक हस्तक्षेप बन्द याः, योग्यता प्रणाली (मेरिटोक्रेसी) लागू याः, कुलपतिइ प्रधानमन्त्री व सहकुपतिइ शिक्षा मन्त्री जुइगु वर्तमान व्यवस्था खारेज या धयागु माग तयाः प्लेकार्ड ब्वःगु खः । ज्याझ्वः जुयाच्वंगु थासय् प्रदर्शन व नाराबाजी जुइवं प्रदर्शनकारीतय्त प्रहरी ज्वंगु खः । ज्वंपिं विद्यार्थीतय्त म्हिगः हे भ्वं याकाः त्वःतूगु दु ।