थप स्वंगू प्रान्तीय राजधानी तालिबानया कब्जाय्
एजेन्सी- तालिबानतय्सं थप स्वंगू प्रान्तीय राजधानी कब्जाय् काःगु दु । थ्व लिसें स्वन्हुया दुने आफगानिस्तानया न्यागू प्रान्तीय राजधानी तालिबानया कब्जाय् लाःवंगु दु । वंगु शुक्रवाः तालिबानतय्सं दक्षिण पश्चिमय् लाःगु निम्रोज प्रान्तया जारन्जयात कब्जाय् काःगु खःसा शनिवाः उत्तरी क्षेत्रय् च्वंगु जोजन राज्यय् च्वंगु सेबर्घान शहर कब्जाय् काःगु खः । अथे हे आइतवाः छन्हुं हे तालिबानतय्सं स्वंगू प्रान्तीय राजधानीयात कब्जाय् काःगु खः ।
अफगानिस्तानया उत्तरी क्षेत्रय् च्वंगु कुन्दुज, सार ए पुल व तालोकान सहरयात आइतवाः कब्जाय् काःगु खः । तालिबानतय्सं कब्जाय् काःगु सहर मध्ये कुन्दुज दकलय् महत्वपूर्ण सहर खः । कुन्दुज अफगानिस्तानया राजधानी काबुललिसे स्वाःगु सहर खः । तालिबानया कब्जा लिपा कुन्दुज सहर अस्तव्यस्त जुयाच्वंगु दु ।
तालिबानतय्सं विज्ञप्ति पिकयाः कुन्दुज, सार ए पुल व तालोकान सहर थःपिनिगु कब्जाय् वयेधुंकूगु धाःगु दु । अफगानिस्तानया सुरक्षा स्रोतं समाचार संस्था एएफपीयात बिउगु जानकारीकथं सरकारं ग्वाहालि छ्वयाहये मफुगुलिं सरकारी सेनां सहर त्वःतेमाःगु खः । अफगानिस्तानया सरकारं धाःसा सरकारी सेनां तालिबानतय्त मू सहरं ख्यानाछ्वयेत ल्वानाच्वंगु खँ धाःगु दु । अफगानिस्तानया पश्चिमय् च्वंगु हेरात व दक्षिणय् च्वंगु कन्दाहार व लस्कर गाहय् युद्ध जुयाच्वंगु दनि ।
तालिबानतय्सं अफगानिस्तानलिसे युद्धविरामया सम्झौता मजूगु व अमेरिकायात युद्धय् हस्तक्षेप मयायेत नं ख्याच्वः बिउगु दु । आइतवाः अमेरिकाया सेनां तालिबानय्सं कब्जाय्् काःगु सबर्घानय् हवाइ आक्रमण याःगु खः । अमेरिकाया सेनां याःगु आक्रमणय् तालिबानया लडाकूत सीगु धाःसां थुकिया पुष्टि धाःसा जूगु मदुनि ।
LEAVE YOUR COMMENTS