इरानं परमाणु कार्यक्रम संचालन यानाच्वंगु इजरायलया दावी

इरानं परमाणु महत्वाकांक्षाबारे विश्वयात मखुगु खँ ल्हाःगु धकाः इजरायलं बिउगु द्वपंयात इरानं अस्वीकार याःगु दु । इजरायलं तेहरानया परमाणु महत्वाकांक्षायात कयाः विश्वयात मखुगु खँ ल्हाःगु प्रमाणित जूगु हजारौं पानाया दस्तावेज थःपिंके दुगु दावी याःगु खः ।

मेखे इरानी विदेशमन्त्री जभाद जारिफं धाःसा अन्तर्राष्ट्रिय परमाणु ऊर्जा निकायं सम्बोधन यायेधुंकूगु पुलांगु दस्तावेजयात हे हाकनं मिले यानाः न्ह्यब्वःगु टिप्पणी यानादीगु दु ।इरानलिसेया अन्तर्राष्ट्रिय परमाणु सम्झौता त्वाःथलेगु अमेरिकी राष्ट्रपतिया चाहनायात ग्वाहालि यायेगु निंतिं इजरायलं थ्व दावी याःगु खँ विदेशमन्त्री जारिफं धयादीगु दु ।

इजरायली प्रधानमन्त्री बेन्जामिन नेतान्याहुं धाःसा थ्व दस्तावेज सन् २०१५ या सम्झौता लिपा इरानं थःगु परमाणु ज्ञान अभिवृद्धि यायेगु निंतिं निरन्तर ज्या यानाच्वंगु प्रमाणित याःगु खँ धाःगु दु । इजरायलया थ्व दावी लिपा अमेरिकी राष्ट्रपति कार्यालय ह्वाइट हाउसं इजरायलं सार्वजनिक याःगु विवरण थःपिंत न्हापा वःगु विवरण लिसे मिले जूगु धासें इरानं गोप्य रुपं थःगु परमाणु कार्यक्रमयात निरन्तरता बियाच्वंगु पुष्टि जूगु खँ धाःगु दु ।

तर राष्ट्रपति ट्रम्पं वइगु निवाः लिपा निर्णय यायेबलय् इरान लिसेया परमाणु सम्झौता त्वाःथलेगु मथलेगु धयागु बारे धाःसा छुं धयादीगु मदुनि ।राष्ट्रपति ट्रम्पं ताःई न्ह्यवनिसें थ्व सम्झौता इरानया पक्षय् दुगुलिं कि खारेज यायेमाः मखुसा संशोधन यायेमाः धया वयाच्वंगु खः । तर उगु सम्झौताय् हस्ताक्षर याःगु मेमेगु देय् बेलायत, फ्रान्स व रुसं ट्रम्पयात उगु सहमतिं अलग मजुइत धया वयाच्वंगु दु ।