
एजेन्सी÷ कोलम्बियाया छगू जेलय् कोरोना भाइरस न्यंगु हल्लां यानाः जूगु दंगाय् लानाः २३ म्ह कैदीत सीगु दु । प्रहरीया कथं कोरोना सरे जूगु आशंकां कैदीत बिसिउँ वनेगु कुतः याःबलय् थ्व दंगा जूगु खः ।
कोलम्बियाया कानुन मन्त्री मार्गरिटा काबेलोया कथं बोगोटाया लामोन्डेलो झ्यारखानाय् जूगु थ्व हिंसाय् मेपिं ८३ म्ह कैदीत नं घाःपाः जूगु दु । कोरोनाया ग्याःचिकुं यानाः देय्न्यंकंया हे झ्यारखानाय् च्वंपिं कैदीतय्सं स्वास्थ्य सेवा बांमलाः धकाः आइतवाः विरोध प्रदर्शन याःगु खः ।
मन्त्री काबेलां कोलम्बियाया १३ गू झ्यारखानाय् तनाव तच्वःगु खःसां लामोन्डेलाया झ्यारखानाय् सुनियोजित रुपं हिंसा न्यंकूगु खँ धयादीगु दु । मन्त्री काबेलों सरसफाइया समस्याया कारणं कारागाराय् हिंसा जूगु मखु धयादीगु दु । वय्कलं आःतक झ्यारखानाय् च्वंपिं सुं नं बन्दी वा कर्मचारीयात कोरोना भाइरसया संक्रमण मजूगु खँ नं धयादीगु दु ।
वय्कलं हिंसाय् संलग्न छुं कैदीतय् विरुद्ध हत्या व सार्वजनिक सम्पत्तिइ क्षति याःगु द्वपनय् मुद्दा न्ह्याकेगु खँ धयादीगु दु ।
LEAVE YOUR COMMENTS