अमेरिका लक्षित चिनिया सामान निर्यातय् प्रतिबन्ध

एजेन्सी – अमेरिकायात लक्षित यानाः चीनं सामान निर्यात सम्बन्धी कठोर कानुन हःगु खः । थ्व कानुन कथं नियन्त्रित वस्तुत निर्यातय् प्रतिबन्ध तयाबिउगु दु। थ्व नियमत चिनियाँ राष्ट्रिय सुरक्षाय् प्रतिकूल प्रभाव लाइगु सैन्य प्रविधि व मेमेगु उत्पादनया निर्यातलिसे सम्बन्धित खः ।

चीनं हःगु थ्व न्हूगु नियम अमेरिकां ल्ह्वःगु थज्याःगु हे कथंया पलाःया लिसः जूगु खा धाःगु दु । मंगलवाःनिसें कार्यान्वयनय् वःगु थ्व न्हूगु नियमं चीन व अमेरिका दथुइ न्ह्यानाच्वंगु व्यापार युद्धयात अझ तच्वयेकीगु खँ धाःगु दु । अमेरिकां छुं ई न्ह्यव हे टिकटक, हुवावे व टेन्सेन्ट थेंज्याःगु चिनियाँ कम्पनीइ अंकुश तयेगु ज्या यायेधुंकूगु दु ।

अमेरिकी राष्ट्रपति डोनाल्ड ट्रम्पं थुपिं कम्पनीतय्सं चिनियाँ सरकारयात सुचं उपलब्ध याकाच्वंगु धासें थीथी चिनियाँ प्रविधि कम्पनीयात प्रतिबन्ध तयेगु आदेश बिउगु खः । चीनं आः हःगु न्हूगु कानुन प्रविधि युद्ध तच्वयावंगुया प्रतिक्रिया कथं वःगु खँ नेशन युनिभर्सिटी अफ सिंगापुरया प्राध्यापक एलेक्स काप्रीं धयादीगु दु । वय्कःया कथं चीनं थःपिनिगु बल्लाःगु प्रविधियात मेपिंत छ्ययेके मबिइगु कुतः कथं थ्व निकासी सम्बन्धी कानुन हःगु खः ।

बिबिसी एशिया बिजनेश रिपोर्टलिसे खँ ल्हासें वय्कलं धयादीगु दु, ‘चीनं आर्टिफिसिय इन्टेलिजेन्स (एआई) व कम्प्यूटर एल्गोरिदमयात नियन्त्रण यानाः अमेरिकां चिनियाँ कम्पनीयात तःगु प्रतिबन्धया बदला स्वरुप थज्याःगु प्रविधि मेपिंत छ्ययेके मबिइत स्वःगु खनेदु ।’

प्रोफेसर काप्रीया कथं अमेरिका व चीन दथुइ न्ह्यानाच्वंगु थ्व व्यापार युद्ध आः अमेरिकाय् न्हूम्ह राष्ट्रपतिं सत्ता लःल्हाना कायेधुंकाः नं न्ह्याना हे च्वनीगु खनेदु। ‘आः चीनलिसे न्हूगु शितयुद्धय् दु, अले थ्व प्रविधि शितयुद्ध खः’ वय्कलं धयादीगु दु । चीनं निर्यातय् नियन्त्रण तःगु सामानयात थीथी समूहय् बर्गिकृत याःगु दु, गुकी परमाणु, सैन्य सामग्री व गैर सैनिक व सैनिक निखेरं छ्यलाबुलाय् वइगु सामानत लाः । थ्व कानुन कथं नियम हाचां गायाः निर्यात यात धाःसा साढे सातलाख डलर निसें कारोवारया १० गुणा तक जरिवाना यायेगु व्यवस्था न्हूगु कानुनय् याःगु दु। अथेहे थ्व कानुन कथं देशं पिने च्वंगु संस्था व व्यक्तियात नं कारवाही यायेफइ ।

थ्व कानुनं पृथ्वीं पिकाइगु दुर्लभ खनिजया निर्यातय् नं प्रभावित यायेफुगु धासें थज्याःगु सामानया भाः थहां वंगु दु। चीन दुर्लभ बहुमूल्य खनिजया दकलय् तःधंगु आपूर्तिकर्ता देय् खः । थ्व खनिज मोबाइल फोन निसें वायु ऊर्जाया निंतिं आवश्यक टर्बाइन थेंज्याःगु विद्युतीय सामग्री दयेकेत छ्यली ।

सम्बन्धित बुखँ

LEAVE YOUR COMMENTS