चन्द्रमाय् कपाय्या पुसा ह्वल

सन् १९६९ जुलाइ २० कुन्हु अमेरिकाया नील आर्मस्ट्रंगं चन्द्रमाय् न्हापांखुसी पलाः तःगु इलंनिसें चन्द्रमाय् मानव वस्तीया थीथी सम्भाव्यतायात कयाः अध्ययन, अनुसन्धान, खोज जुया वयाच्वंगु खः । थुकिया निंतिं विश्वया आपालं विकासशील देया वैज्ञानिकतय्सं अनेककथं अध्ययन अनुसन्धान यानाः सत्यतथ्य पित हयेगु कुतः गुगु यानाच्वंगु खः, व आतक नं जारी हे दु ।

थ्व हे झ्वलय् लिपांगु इलय् चन्द्रमाय् स्वां–सिमाया पुसा बुया वःगु समाचार पिहां वःगु दु । अले थ्व पुसा बुइकेगु ज्या याःगु खः चीनं । चन्द्रमाय् छ्वःगु चिनिया ‘चाङ’इ–४ यानय् कपाय्या पुसा बुया वःगु खः । वंगु मंगलवाः चिनिया वैज्ञानिकतय्सं चन्द्रमाय् पुसा बुया वःगु खँय् थःपिंत ऐतिहासिक फलता प्राप्त जूगु जानकारी संचारमाध्यमयात बिउगु खः ।

खतुं चन्द्रमाय् थुकथं जैविक पदार्थ बुया वःगु धइगु थ्व न्हापांखुसी हे खः । थुकियात वैज्ञानिकतय्सं अन्तरिक्षबारे ताःई न्ह्यवंनिसें यानाच्वंगु अनुसन्धानय् प्राप्त ऐतिहासिक सफलताया संज्ञा नं बिउगु दु । चन्द्रमाय् कपाय् माया पुसा बुया वःगु बारे जानकारी बिसें चिनिया वैज्ञानिक शाई गेङ सिनं धाःगु दु, ‘चिनिया रोभर चाङ’ई–४’ यान थ्व हे महिनाय् जक चन्द्रमाय् अवतरण याःगु खः ।

जिमिसं फय्, लः व चा तयातःगु छगः १८ सेन्टिमिटरया बट्टा छ्वयागु खः । गुगु बट्टाय् आलु, कपाय् व तुया पुसा तयाः छ्वयागु खः ।’चिनिया वैज्ञानिक सिनया कथं यानं छ्वया हःगु किपातय् कपाय्या पुसा बांलाक हे ह्वयाच्वंगु दु । कपाय् बाहेकं मेमेगु जैविक पदार्थया पुसा बुया वःगु मदु ।

चीन वंगु महिनाय् जक चन्द्रमाया सतहया अध्ययनया निंतिं धकाः चाङ’ई–४ ल्याण्ड रोभर यान प्रक्षेपण याःगु खः । थ्व यान थ्व हे जनवरी ३ तारिखकुन्हु चन्द्रमाय् सफलतापूर्वक अवतरण याःगु खःसा चीनया थ्व अभियान आतक चन्द्रमाया अध्ययनया निंतिं जुयाच्वंगु अभियानया झ्वलय् थ्व छगू बिस्कंया अभियान व सफलता नं खः ।

 

सम्बन्धित बुखँ

LEAVE YOUR COMMENTS