ने. सं. ११४३ चौलाथ्व तृतीया -

अमेरिकाया स्वयां चीनया कुटनीतिक उपस्थिति अप्वल

कुटनीतिक उपस्थितिइ चीनं अमेरिकायात लिउने लाकूगु दु । अस्ट्रेलियाया छगू संस्थां पितबिउगु तथ्यांक कथं चीन विश्वया दकलय् अप्वः थाय् कुटनीतिक उपस्थिति दुगु देय् जूगु खँ धाःगु दु । लोयी इन्स्टिच्यूटया कथं सन् २०१९ तकया दुने विश्वन्यंकं चीनया राजदूतावास व मेमेगु कुटनीतिक ज्याकूया ल्याः २७६ गू थ्यंगु दु, गुगु अमेरिकाया स्वयां अप्वः खः ।

अमेरिकाया विश्वन्यंकं २७३ गू ज्याकू दुसा थ्व धुंकाः छसिकथं फ्रान्स, जापान व रुसया दु । बेलायत थ्व धलखय् झिंछगूगु थासय् लानाच्वंगु दु । उगु प्रतिवेदनय् राजदूतावास, उच्च आयोग व वाणिज्य दूतावासतय् गणना याःगु दुसा थुकी अध्ययनकर्तातय्सं थ्व ल्याखं भूराजनीतिक पहुँचया शक्ति व कमजोरी क्यनेत स्वःगु दु ।

चीनया कुटनीतिक उपस्थिति छुं दँ न्ह्यवनिसें तीव्रगतिं न्ह्याःवंगु खः । सन् २०१६ य् अमेरिका व फ्रान्स धुंकाः स्वंगूगु थासय् लानाच्वंगु चीन सन् २०१७ निगूगु थासय् थ्यंगु खः । अमेरिकां नं सन् २०१६ धुंकाः निगू थासय् कुटनीतिक उपस्थिति अप्वयेकूगु दु । बेलायतं धाःसा थ्व अवधिइ कुटनीतिक उपस्थिति म्हो जूवंगु दु ।

सन् २०१६ य् २१६ गू थासय् उपस्थिति दुगु बेलायतया आः धाःसा २०५ गू थासय् जक उपस्थिति दु ।दक्षिण एशियाली देय्पाखें धाःसा दकलय् अप्वः कुटनीतिक उपस्थिति भारतया दु ।

भारतया विश्वया १८६ गू थासय् कुटनीतिक ज्याकू दु । अथेहे पाकिस्तानया ११७ गू थासय् बंगलादेशया ७५ गू थासय् व श्रीलंकाया ६७ गू थासय् कुटनीतिक उपस्थिति दु । प्रतिवेदन कथं नेपाःया ३९ गू थासय् कुटनीतिक उपस्थिति खः, गुगु सन्२०१६ स्वयां स्वंगुलिं अप्वः खः ।