छगू ट्विटं राष्ट्रिय विदाया घोषणा

फेसबुक, ट्विटर, ह्वाट्सएप, इन्स्टाग्राम थेंज्याःगु सामाजिक संजालय् न्हियान्हिथं हे लखौं लख प्रयोगकर्तातय्सं छुं न छुं पोस्ट यानाच्वंगु दइ । अज्याःगु पोस्टयात लाइक, कमेन्ट व शेयर याइपिं नं दयाच्वनी । थुकिं खास हे छुं पाइमखु । तर छम्ह मनुखं याःगु ट्विटं वयात ‘राष्ट्रिय हिरो’ हे दयेकाबिल धाःसा वं गज्याःगु पोस्ट याःगु जुइ धइगु सीकेत उत्सुक ला न्ह्याम्हं जुइ ।

टर्कीया छम्ह सामान्य मनुखं ट्विटरय् मात्र ‘जिके छगू आइडिया दु’ धकाः ट्विट याःगु जुयाच्वन । स्वयेबलय् तसकं सामान्य थ्व खँग्वः वयात रािष्ट्रय हिरो दयेकेत काफी जुल ।एनस साहिन नांया उम्ह मनुखं थःगु ट्विटरय् ‘जिके छगू आइडिया दु । झीसं थःपिंसं हे छाय् राष्ट्रिय वृक्षारोपणया घोषणा मयायेगु ? झीसं दँय्दसं छन्हु विदा काइ अले वृक्षारोपण यानाच्वना ।

झासँ विश्वयात छगू उदाहरण न्ह्यब्वये अले न्हू पुस्तायात नं देय् हराभरा यानाः लःल्हाये ।’ थुलि च्वयाः ट्विट याःगु खः । साहिनया थ्व ट्विट घौपलखं हे थुलि भाइरल जुया बिल कि स्वस्वं हे ५५ द्वः मनुखं उकियात कयाः प्रतिक्रिया प्वंकल । स्वयं टर्कीया राष्ट्रपति रसेप तैयप अर्दोगानं नं ‘थ्व छगू महान सोच खः जिमिसं न्ह्याबलें नं देय्यात हराभरा यायेगु कुतः यानाच्वना, वइगु दिनय् नं यायेगु जुइ ।

थुकिया जिम्मेवारी कासें झीगु थःगु हे राष्ट्रिय वृक्षारोपण दिवस दयेमाः धइगु सोच यःताल ।’अन्ततः राष्ट्रपतिया उकथंया टिप्पणीलिसें सरकारं राष्ट्रिय वृक्षारोपणलिसें राष्ट्रिय विदाया नं घोषणा यात ।