ने. सं. ११४४ कौलाथ्व सप्तमी - फूलपाती

अफगानिस्तानय् तच्वःगु मूल्यवृद्धि, बैंक मचालाः ध्यबा कायेगु मदु

अफगानिस्तान तालिबानय् कब्जाय् वंगु छवाःया दुने अन व्यापक मूल्यवृद्धि जूगु दु । अथेहे कर्मचारीत सुं मवःगुलिं बैकिङ सेवात फुक्क बन्द जुयाच्वंगु दु । तालिवानतय्सं कब्जा यायेधुंकाः जूगु अनिश्चितताया लबः कयाः व्यापारीतय्सं भाः थकाःगु खः । उकिसनं बैंक बन्द जूगुलिं ध्यबा मदयाः सर्वसाधारणं तःधंगु सास्ती फयेमालाच्वंगु दु ।
खामा प्रेसया कथं सरकारी अधिकारी व निजी कर्मचारीत नं आर्थिक समस्या लानाच्वंगु दु । आः उमिगु ज्या छु जुइगु व तलब छु जुइ धयागु हे धायेफयाच्वंगु मदु । सरकारी कर्मचारीतय्सं वंगु महिनाया हे तलब कायेखंग मदुनि ।

अफगानिस्तानया दकलय् तःधंगु ध्यबा हिलीगु जाः साराइ शाहजाद बन्द जूगुलिं नं काबुलया मनूतय्त ध्यबाया समस्या जुयाच्वंगु दु । बैंक व एटिएम बन्द जूगुलिं उमिसं थःपिनि खाताय् ध्यबा दुसां नंं ध्यबा कायेखंगु मदुनि । शनिवाः साराइ शाहजादां छगू बयान पितबिसें मुद्रा सतही बजाः अफगानिस्तानया केन्द्रीय बैंक, अफगानिस्तान बंैकलिसे प्रत्यक्षरुपं निर्भर जुइगुलिं बैंकं सेवा मबिइकं बजाः हाकनं चायेके मफइगु खँ धाःगु दु ।

तालिबानतय्सं सत्ता कब्जा याःसां सरकारी बैंक चायेकेगु बारे आःतक छुं धाःगु मदुनि । तालिबानतय्सं छवाः न्ह्यः काबुल कब्जा कायेवं राष्ट्रपति असरफ गनी बिसिउँ वंगु खःसा उबलें निसें अफगानिस्तान सरकारविहीन जुयाच्वंगु दु ।

थ्वहे दथुइ अमेरिकी गुप्तचर निकाय सिआइएं काबुलय् आतंकवादीय् आक्रमण जुइफुगु ख्याच्वः बिउगु दु । सिआइएया रिपोर्ट वयेधुंकाः अमेरिकां थः नागरिकतय्त काबुल विमानस्थलया मू ध्वाखापाखे मवनेत धाःगु दु । अफगानिस्तानस्थित अमेरिकी दूतावासं छगू सुचं जारी यासें विमानस्थलय् इस्लामिक स्टेट –आइएस)या आक्रमण जुइफुगुलिं विमानस्थलपाखे वनेगु मू लं मवेनत धाःगु खः । अमेरिकां काबुल विमानस्थलय् आइएसया आक्रमण जुइफु धाःसां आइएसं धाःसा थज्याःगु आक्रमण यायेगु छुं कथंया ख्याच्वः धाःसा बिउगु मदुनि ।