अमेरिकाय् भेन्टिलेटरया अभाव

एजेन्सी – संयुक्त राज्य अमेरिकाय् कोरोना भाइरस (कोभिड-१९)या संक्रमिततय् ल्याः न्हिया न्हिथं अप्वया वनाच्वंगु दु । आइतवाः तकया दुने छगू लख ४२ हजार मनूत संक्रमित जुइधुंकूगु दुसा २ हजार ४८४ मनूत सीधुंकूगु दु ।

उकी मध्ये दकलय् अप्व लिच्व लाकाच्वंगु न्यूयोर्कय् ६० हजार मनूत संक्रमित जूगु दुसा सीपिनि ल्या छन्हुं हे २३७म्ह थहांवना ९६५म्ह थ्यंगु दु । थ्वहे दथुइ कोलम्बिया विश्वविद्यालय मेडिकल सेन्टरया डा. क्रेग स्मिथं मेगू वाःया दुने अन भेन्टिलेटर व अस्पतालय् वासः याकेगु थाय्या अभावं तसकं लिच्व लाकीगु खँ धयादीगु दु । न्यूयोर्क शहरया गभर्नर बिल डे ब्लासियों छुं ईया दुने सयौंया ल्याखय् भेन्टिलेटर नापं मास्क, पीपीइ लगायतया सामान मालीगु धयादिल ।

उखे न्यूवर्लिन्स राज्यय् वइगु अप्रिल ४ तारिखं निसें भेन्टिलेटरया अभाव जुइगु खनेदुगु दु । लुजियानाया अधिकारीत अझ नं केन्द्र सरकारपाखें भेन्टिलेटर दइगु खः वा मखु धइगु बारे अस्पष्ट खनेदु । लुजियानां छगू व्यापारिक कम्पनी नाप १२ हजार भेन्टिलेटरया माग याःगु खःसां आः तक मुक्कं १९२गः जक ल्हातय् लाःगु धासें अनया गभर्नर जोन बेल इड्वाडं चिउता प्वंकादिल ।

(ने. सं. ११४० चौलाथ्व ६/ वि. सं २०७६ चैत १७, साेमवाः)