गरिब स्वयां धनीपाखें अप्वः प्रदूषण

पेरिस (एएफपी) – विश्वय् वातावरण प्रदूषण प्रमुख समस्या जुयाच्वंगु दु। प्रदूषणया मुख्य कारणं गरिबी व गरिब राष्ट्र खः धायेगु याना वयाच्वंगु दु। तर थुकथंया धापू वा द्वपं असत्य जूगु छगू अध्ययनं क्यंगु दु। उगु अध्ययनकथं विश्वया दकलय् अप्वः धनी छगू प्रतिशतं विश्वया अति गरिबं स्वयां न्यय् दुगः अप्वः प्रदूषण न्यकाच्वंगु दु। अध्ययनकथं विश्वया छगू प्रतिशत धनी मनुखं याइगु कार्बन उत्सर्जन प्रदूषण विश्वया दकलय् गरिब ३ गू अर्ब १० गू करोड जनसंख्यां याइगु प्रदूषण स्वयां निदुगः दु ।

स्टकहोम वातावरण इन्ष्टिच्युटं अक्सफाम निंतिं याःगु अध्ययनं थ्व तथ्य पिहां वःगु खः । अक्सफामया नेतृत्वय् जूगु अध्ययन विश्लेषणकथं सन् १९९० निसें २०१५ या दथुइ वार्षिक कार्बन उत्सर्जन ६० प्रतिशत स्वयां अप्वः दु। थुकी पृथ्वीइ उत्सर्जन जूगु कुल कार्बनया स्वब्वय् छब्व धनी राष्ट्र जिम्मेवार दु ।

खतुं लिपांगु इलय् कोरोना भाइरसया महामारीं यानाः कार्बन उत्सर्जनय् गाक्कं म्होति वःगु दु। अथे खःसां थ्व छगू शताब्दी पृथ्वी गाक्कं डिग्रीइ क्वानाच्वनीगु व उकिया असर नं लानाच्वनीगु जक मखसे गरिब व विकासशील राष्ट्रय् प्राकृतिक प्रकोप व मेमेगु विपदया नं खतरा अप्वः जूगु अध्ययनं क्यंगु दु ।