चीन व ताइवानया दथुइ वंगु ४० दँया दुने दकलय् खराब सैन्य सम्बन्ध

एजेन्सी- ताइवानया रक्षामन्त्री चिउ कुओ चेंग वंगु ४० दँया दुने चीन व ताइवान दथुया सैन्य सम्बन्ध दकलय् बांमलाःगु स्थितिइ थ्यंगु धाःगु दु । प्यंन्हु न्ह्यवंनिसें ताइवानया रक्षा क्षेत्रय् चीनया सैनिक विमान दुहां वयाच्वंगुलिं रक्षामन्त्री चिउया थ्व प्रतिक्रिया वःगु खः । रक्षामन्त्री चिउं सन् २०२५ तकया दुने चीनं ताइवानय् हमला यायेफइगु नं धाःगु दु । रक्षामन्त्री चिउ चीनयाके क्षमता दुसां युद्ध सहज मजुइगु व यक्व खँय् बिचाः यायेमाःगु धाःगु दु । ताइवानं थःपिंत स्वतन्त्र मुलुक धयाच्वंसां चीनं धाःसा ताइवानयात थःपिनिगु प्रदेश थें व्यवहार यानाच्वंगु दु ।

चीनं अक्टोबर शुरु जुसांनिसें थःपिनिगु १५० गः विमान ताइवानया रक्षा क्षेत्रय् छ्वयेधुंकल । चीनिया मिडियां थुकियात शक्ति प्रदर्शन धाःगु दु । विश्वया थीथी देसं धाःसा चीनया थ्व ज्यायात मेगु देशयात ख्यायेत स्वःगु व आक्रामकता क्यंगु धाःगु दु ।

ताइवानया राष्ट्रपति साइ इंग वानं फरेन अफेयर्सबारे छपु च्वसु च्वयाः चीनं ताइनवानयात थःपिनिगु नियन्त्रणय् कायेत स्वल धाःसा उकिया लिच्व विनाशकारी जुइगु ख्याच्वः बिउगु दु । ताइवानया प्रधानमन्त्री सु सेंग चाँगं नं चीनया आक्रामकता क्षेत्रीय शान्तिया निंतिं खतरा जूगु व ताइवान सतर्क जुयाच्वनेमाःगु धाःगु दु ।

थ्व हे झ्वलय् अमेरिका व चीनया दथुइ वार्ता जूगु दु । अमेरिकाया राष्ट्रपति जो बाइडेन व समकक्षी सी जिङपिङया दथुइ जूगु वार्ता लिपा बाइडेनं चीनलिसे ताइवानया विषययात कयाः खँल्हाबल्हा जूगु धाःगु दु ।

सम्बन्धित बुखँ

LEAVE YOUR COMMENTS