कोरोना भाइरस : विश्वन्यंक सीपिं २ लखं अप्वल

येँ – विश्वन्यंक जुयाच्वंगु कोरोना भाइरस (कोभिड-१९)या महामारीया कारणं सीपिनि ल्याः २ लखं अप्वःगु दु ।

सन् २०१९या डिसेम्बर महिनाय् चीनया वुहानं सुरु जूगु कोभिड-१९या कारणं विश्वन्यंक २ लख ३ हजार २८९म्ह संक्रमितत सीधुंकूगु दु । जोन हप्किन्स विश्वविद्यालयया कथं आः तक २९ लख २१ हजार मनूत थुगु भाइरसपाखें संक्रमित जूगु दु । अथेहे २ लख ३ हजार संक्रमितत स्वस्थ्य जुयाः छेँय् लिहांवनेधुंकूगु दु ।

कोभिड-१९पाखें दकलय् अप्व अमेरिका व युरोपेलि देशय् संक्रमित जूगु दु । अमेरिकाय् जक ५४ हजार मनूत सीधुंकूगु दुसा ९ लख ६० हजार मनूत संक्रमित जूगु दु ।

थुके कोभिड-१९पाखें दकलय् अप्व प्रभावित याःगु एशियाली देय् चीन व दक्षिण कोरियाय् धाःसा संक्रमिततय् ल्याः म्हो जुयाच्वंगु दु । शनिवाः चीनय् ११म्ह व दक्षिण कोरियाय् १०म्ह जक न्हूपिं संक्रमित खनेदुगु खः ।