बिन लादेनया काय सीगु अमेरिकी दाबी

अमेरिकी गुप्तचरनिकायया अधिकारीतय्सं आतंककारी संगठन अल कायदाया संस्थापक ओसामा बिन लादेनया काय हम्जा सीधुंकूगु दावी याःगु दु । अमेरिकीतय्सं हम्जाया मृत्य जुइधुंकूगु दावी याःसां गुबलय् व गन सीगु धयागु धाःसा स्पष्ट जानकारी मबिउनि ।

वंगु फेबु्रअरी महिनाय् जक अमेरिकी सरकारं हम्जा च्वनाच्वंगु थाय्या जानकारी बिउम्हेसित १० लाख अमेरिकी डलर सिरपाः बीगु घोषणा याःगु खः । खुला न्ह्यव जक साउदी अरबं हम्जाया नागरिकता खारेज यानाबिउगु खः । थ्यंमथ्यं स्वीदँति दुम्ह हम्जां छुं ई न्ह्यवनिसें अमेरिका व मेमेगु देशय् आक्रमण यायेत इनाप यासें भिडियो व अडियो सार्वजनिक याना वयाच्वंगु खः ।

हम्जा सीधुंकूगु खबर दकलय् न्हापां एनबीसी व न्यूयोर्क टाइम्सं सार्वजनिक याःगु खः । तर अमेरिकी राष्ट्रपति डोनाल्ड ट्रम्पं बुधवाः थ्व बारे छुं नं टिप्पणी यायेत अस्वीकार यानादीगु दु । हम्जां थः अबु ओसामा बिन लादेनयात अमेरिकां हत्या याःगु धासें थुकिया बदला कायेत जिहादीतय्त इनाप याना वयाच्वंगु खः ।

लादेनयात अमेरिकाया छथ्वः विशेष सेनां सन् २०११ य् पाकिस्तानय् स्यानाबिउगु खः ।हम्जायात अल कायदा दुने वया अबुया उत्तराधिकारी कथं उदय जुया वयाच्वंम्ह तायेकातःगु दु । वं अप्वः थें प्रायःद्वीपया जनतायात विद्रोहया आह्वान यायेगु याना वयाच्वंगु खः ।

खुला न्ह्यव साउदीं हम्जाया नागरिकता रद्द यानाबीधुंकाः व अफगानिस्तना, पाकिस्तान वा सिरियाय् च्वनाच्वंगु अनुमान याना याना वयाच्वंगु दु ।सन् २०११ य् पाकिस्तानय् ओसामा बिन लादेनया निवासय् छापा मारे याःबलय् हम्जायात अल कायदाया नेतृत्व बीगु निंतिं तयार यानाच्वंगु थीथी भ्वँत लुया वःगु खँ अमेरिकी विदेश मन्त्रालय्ं धाःगु दु ।

अमेरिकी सेनां अलकायदाया हे मेम्ह छम्ह वरिष्ठ नेताया म्ह्याय् नाप हम्जाया इहिपा जूगु भिडियो नं लुइकूगु खँ धाःगु दु । वया ससःअबु अबु मुहम्मद अल मस्री नामं म्हसिका दुम्ह अब्दुल्लाह अहमद अब्दुल्लाह खः । सन् २०१८ य् तान्जानिया व केन्याय् च्वंगु अमेरिकी दूतावासय् जूगु आत्रमणय् वयागु ल्हाः दुगु आशंका यानातःगु दु ।

अल कायद सन् २००१ सेप्टेम्बर ११ य् अमेरिकाय् जूगु ट्रेड टावर आक्रमणय् संलग्न आतंककारी पुचः खः । तर थौंकन्हय् इस्लामिक स्टेटया प्रभाव अप्वया वनेवं थ्व पुचःया शक्ति धाःसा कमजोर जुया वनाच्वंगु अनुमान यानातःगु दु ।

सम्बन्धित बुखँ

LEAVE YOUR COMMENTS