भारतय् संक्रमिततय् ल्याः ५० लाख स्वयां अप्वल

एजेन्सी – भारतय् कोरोना भाइरस संक्रमिततय् ल्याः न्हियान्हिथं अप्वया वनाच्वंगु दु । थ्व झ्वलय् बुधवाः तकया दुने थन संक्रमिततय् ल्याः ५० लाखं च्वये थहां वंगु दु । दकलय् अप्वः कोरोना भाइरसं प्रभावित देय्तय् धलखय् भारत अमेरिका धुंकाः निगूगु थासय् लानाच्वंगु दु । थौंकन्हय् भारतय् न्हि हे ९० हजारया ल्याखं मनूतय्त संक्रमण न्यना वनाच्वंगु दु । थन आःतक कोरोनाया कारणं ८० हजारं मल्याक मनूतय् ज्यान वने धुंकूगु दु ।

कोरोना संक्रमिततय् ल्याः अप्वया वंलिसें भारतय् उपचारया निंतिं आइसियु बेडया लिसें अक्सिजन तकं अभाव जुया वःगु दु । कोरोनाया कारणं सासः ल्हाये समस्या जूपिं संक्रमितत अप्वया वयेवं भारतय् कृत्रिम अक्सिजनया माग ह्वाट्ट हे अप्वया वःगु खः । थौंकन्हय् भारतया अस्पताल व स्वास्थ्य केन्द्रय् न्हि २७०० टन बराबरया अक्सिजन खपट जुयाच्वंगु दु । थ्वयां न्ह्यव अप्रिलय् तक थन मुक्कं ७५० टन जक अक्सिजन खपत जुयाच्वंगु खँ अल इन्डिया इन्ष्ट्रियल ग्यासे स म्यानुफ्याक्चर एशो सियसनं धाःगु दु ।

थौंकन्हय् भार तया महाराष्ट्र, मध्य प्रदेश, गुजरात, राजस्थान, तेलङ्गना व आन्ध्र प्रदेश कोरोनां अप्वः प्रभावित जुयाच्वंगु दु । थौंकन्हय् भारतय् जीवन कि जीवको पार्जन धयागु न्ह्यसः दना वयाच्वंगु दु । कोरोना संक्रमण सुरु जुइवं सरकारं तःगु लकडाउनया कारणं ज्याया अभावं नये त्वने तकं मखनीगु अवस्था वल धकाः विरोध जूगु खः । थ्व लिपा सरकारं लकडाउन चिइकूगु खःसा लकडाउन चिइके धुंकाः कोरोना संक्रमिततय् ल्याः न्हियान्हिथं अप्वया वःगु खः ।