ट्रम्पया न्हूगु शुल्क विरुद्ध अमेरिकाया २५ गू राज्यपाखें मुद्दा दायर
वाशिंगटन – अमेरिकी राष्ट्रपति डोनाल्ड ट्रम्पं युरोपेली युनियन (इयु)लिसें विश्वया ख्वीगू देशय् तःगु आयात शुल्क विरुद्ध अमेरिकाया नीन्यागू राज्यं अदालतय् मुद्दा दायर याःगु दु । अमेरिकी राष्ट्रपति ट्रम्पं प्रशासनं ‘जबरजस्ती श्रम’पाखें उत्पादन जूगु ज्वलंया आयात नियन्त्रण यायेगु नामय् इयुलिसें ख्वीगू देशय् न्हूगु आयात शुल्क लाःगु याःगु विरुद्ध अमेरिकाया हे नीन्यागू राज्यं अन्तर्राष्ट्रिय व्यापार अदालतय् मुद्दा दायर याःगु खः ।
ट्रम्पया न्हूगु शुल्क विरुद्ध क्यालिफोर्निया राज्यया महान्यायाधिवक्ता रोब बोन्टाया नेतृत्वय् एरिजोना व ओरेगन राज्यया महान्यायाधिवक्ता सहितया गठबन्धनं अन्तर्राष्ट्रिय व्यापार अदालतय् मुद्दा दायर याःगु खः । न्हूगु शुल्क कानुनी अधिकार स्वयां पिने वनाः तःगु, अमेरिकी कानुन अःखः शुल्क तःगु व उकियात भार अन्ततः उपभोक्ता व व्यवसायीं हे फयेमालीगु दावी यानातःगु दु ।
मुद्दाय् सन् १९७४ या ‘ट्रेड एक्ट’ या धारा ३०१ अन्तर्गत याःगु अनुसन्धानया लिधंसाय् आः लागू याःगु शुल्क कानुनी मापदण्डकथं मजू नं दावी यानाःगु दु ।
ट्रम्प प्रशासनं सोमवाः युरोेपेली युनियनलिसें चय्गू स्वयां अप्वः व्यापारिक साझेदरपाखें जुइगु आयातय् न्हूगु शुल्क लागू याःगु खः । थुपिं देय्पाखें अमेरिकाय् आयात जुइगु कुल आयातया करिब ९९.४ प्रतिशत दु ।
महान्यायाधिवक्तातय् गठबन्धनं न्हूगु शुल्कया अतिरिक्त आर्थिक भार अमेरिकी उपभोक्ता व व्यवसायं हे फयेमालीगु धासें राष्ट्रपति ट्रम्पं जीवन यापनया लागत अप्वयेकेगु नीति अवलम्बन याःगु द्वपं नं बिउगु दु । महान्यायाधिवक्ता बोन्टां अदालतं थ्व स्वयां न्ह्यः रोके जुयाच्वंगु व्यापारिक उपाययात नं बिस्कं आधारउय् ट्रम्पं प्रशासनं हाकनं लागू यायेत स्वःगु दावी याःगु दु ।
ट्रम्प प्रशासनं न्हूगु शुल्क व्यवस्थाकथं भारत, बेलायत, मेक्सिको, क्यानाडा, इन्डोनेसिया, बंगलादेशयात १० प्रतिशत शुल्क समूहय् तःगु दुसा युरोपेली युनियन, ताइवान, जापान, दक्षिण कोरिया, स्वीट्जरल्याण्डयात १० निसें १२.५ प्रतिशतया बिस्कं शुल्क संरचना लागू याःगु खः ।
ट्रम्पया न्हूगु शुल्क विरुद्ध मुद्दा दायर याःगुलिइ क्यालिफोर्निया, एरिजोना व ओरेगनलिसें कोलोराडो, कनेक्टिकट, डेलावेयर, हवाई, इलिनोइस, म्यासाचुसेट्स, मेरिल्यान्ड, मेन, मिचिगन, मिनेसोटा, नेभाडा, न्युजर्सी, न्युमेक्सिको, न्युयोर्क, नर्थ क्यारोलिना, रोड आइल्यान्ड, भर्जिनिया, भर्मन्ट, वासिङ्टन, विस्कन्सिन, केन्टकी व पेन्सिलभेनिया राज्यया गभर्नरत नं दुथ्याः ।
LEAVE YOUR COMMENTS