विश्वशान्ति विहारय् शोध निर्देशन तालिम

येँ (नेपालभाषा टाइम्स) – थेरवाद बुद्धिष्ट एकेदेमिया ग्वसालय् विश्व शान्ति विहार, न्हू बानेश्वरय् ‘शोध निर्देशन तालिम’ शुरु जूगु दु । लुम्बिनी विश्वविद्यालयया निवर्तमान उपकुलपति प्रा. डा. सुवर्णलाल वज्राचार्यं उगु तालिमया उलेज्या यानादीगु खः ।

उलेज्याझ्वलय् एकेदेमिया अध्यक्ष भिक्षु निग्रोध महास्थविरं ‘पञ्ञावंतस्स अयं धम्मो’ सम्बन्धी कनाबिज्याःगु खःसा मूपाहां प्रा.डा. वज्राचार्यं ‘एच आई व एआई आधुनिक प्रविधिया संक्षिप्त रुप’ या विषयय् कनादीगु खः । थुकथं हे एकेदेमिया प्राचार्य डा. त्रिरत्न मानन्धरं तालिमया आवश्यकता बारे कनादीगु खः ।

साउन १८ निसें २९ गतेतक न्ह्याइगु शोध निर्देशन तालिमय् प्रा.डा. भिक्षु संकिच्च महास्थविर, बौद्ध विद्वानपिं प्रा. डा. मदन मानन्धर, उप प्राध्यापक मदनरत्न मानन्धर, डा. सविता धाख्वा, रीना तुलाधर, व एकेदेमिया प्राचार्य डा. मानन्धर लगायतं प्रशिक्षण बियादी । तालिमय् एकेदेमिपाखें एमए उत्तीर्ण यानादीपिं स्वम्ह विद्यार्थी सहभागि जुयाच्वंगु दु ।