चिकं यंकाच्वंगु जहाजय् इरानं आक्रमण याःगु अमेरिका व बेलायतया द्वपं

एजेन्सी- अमेरिका व बेलायतं इजरायलया कम्पनीं सञ्चालन यानाच्वंगु एमभी स्ट्टिर नांयागु चिकं यंकाच्वंगु जहाजय् इरानं आक्रमण याःगु द्वपं बिउगु दु । अमेरिका व बेलायतं थ्व आक्रमण यानाः इरानं अन्तर्राष्ट्रिय कानून हाचां गाःगु नं धाःगु दु । बेलायतया विदेशमन्त्री डोमिनिक राबं इरानं जहाजय् सिइकचायेकं आक्रमण याःगु व आक्रमण यायेत ड्रोन छ्यःगु द्वपं बिउगु दु ।

विदेशमन्त्री डोमिनिकं थज्याःगु आक्रमण आः थथें पनेमाःगु व ट्यांकर सुरक्षितकथं वये–वने दयेमाःगु धाःगु दु । अथे हे अमेरिकाया विदेश मन्त्री एन्टोनी ब्लिन्केनं इरानं थुकिया लिसः बिइमाः धाःगु दु । इजरालयया प्रधानमन्त्री नेफ्टाली बेनेटं आक्रमण इरानं याःगु व थःपिकें उकिया दसि दु धाःगु दु । प्रधानमन्त्री नेफ्टालीं इरानयात थुकिया लिसः थःपिसं बिइगु नं धाःगु दु ।

वंगुु बिहिवाः एमभी मर्सर नांयागु चिकंया ट्याकंर दुगु जहाजय् आक्रमण जूगु खः । आक्रमणय् लानाः रोमानियाया व बेलायतया छम्ह छम्ह नागरिक सीगु खः । अमेरिका, बेलायत व इजरायलं आक्रमण इरानं याःगु धाःगु खःसां आक्रमणया जिम्मा सुनां नं काःगु मदुनि । इरानं थःपिंत बिउगु दक्व द्वपं आधारहीन धयाच्वंगु दु ।
जापानया मेगु प्यंगू शहरय् संकटकाल

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु