ने. सं. ११४६ दिल्लागा अष्टमी -

उपभोक्तातय् कारणं हे ग्यास अभाव

येँ (नेपालभाषा टाइम्स) – बजारय् ग्यासया अभाव तच्वया वनेवं प्रधानमन्त्री तथा मन्त्रिपरिषदया कार्यालयं ग्यास सहज दयेकेगु उपाय मालेत मंगलवाः सरोकारवालात लिसे सहलह ब्याकूगु दु । मुख्य सचिव गोविन्दबहादुर कार्कीया अध्यक्षताय् जूगु सहलहया झ्वलय् बजारय् ग्यास अभाव जूगु कारण व समाधानया निंतिं सम्बन्धीत मन्त्रालय, विभाग, उद्योगी लिसें ग्यास मीपिं व्यवसायीया भूमिका बारे समीक्षा जूगु खँ प्रधानमन्त्री सचिवालयं धाःगु दु ।

सहलहया झ्वलय् व्यवसायीतय्सं बजारय् हल्ला जू थें ग्यासया अभाव मजूगु दाबी याःगु खः । पश्चिम एसियाय् द्वन्द्व तच्वयेवं ग्यास आपूर्ति असहज जूगुलिं सरकारं ७.१ किलो दुगु बछि सिलिन्डर जक इनेगु शुरु याःगु खःसा आः ग्यास आपूर्ति सहज जूगु धासें वंगु असार ३१ गते निसें १४.२ किलो पुरा जाःगु सिलिन्डर इनेगु ज्या न्ह्यायेवं बजारय् आकाझाकां माग अप्वःगु खँ व्यवसायीतय्सं धाःगु दु । व्यवसायीतय्सं न्हापा स्वयां अप्वः ग्यास आयात जुयाच्वंगु तर उपभोक्ता माक्व स्वयां अप्वः भण्डारण याःगुलिं समस्या ब्वलंगु खँ धाःगु खः ।

बैठकय् ग्यास आपूर्तिइ समस्या खनेदुगु जिल्लाय् ग्यास इनेगु ज्या थप प्रभावकारी यायेगु, नियमित व सहज दयेकेत सम्बन्धित निकाय दथुइ माःगु समन्वय यायेगु लिसें व्यवस्थापनयात तीव्रता बीगु निर्णय याःगु सचिवालयं धाःगु दु । निर्णय कथं वइगु मोहनि नखः व स्वन्ति नखःया झ्वलय् जुइगु उच्च मागयात ध्यानय् तयाः वइगु स्वला तक लय् ५० हजार मेट्रिक टन स्वयां अप्वः एलपी ग्यास आयात यायेगु व्यवस्था मिले यायेगु निर्णय नं बैठकं याःगु दु ।

सहलहया झ्वलय् प्रधानमन्त्री तथा मन्त्रिपरषदया कार्यालयया सचिव विरेन्द्रकुमार यादव, उद्योग, वाणिज्य तथा आपूर्ति मन्त्रालयया सचिव नारायणप्रसाद शर्मा दुवाडी, सहसचिव नेत्रप्रसाद सुवेदी, गृह मन्त्रालयया सहसचिव सुरेश पन्थी, नेपाल आयल निगमया कार्यकारी निर्देशक दिपक बराल, ग्यास उद्योगीतय् मंकाः संगठनया पदाधिकारी लिसें उद्योगी कृष्णभक्त श्रेष्ठ, सुरेन्द्रराज पौडेल, अमित अग्रवाल व रुद्रप्रसाद कोइरालापिं उपस्थिति जुयादीगु खः ।