रामशेखरया ख्यालः महोत्सव क्वचाल
ख्वप (नेपालभाषा टाइम्स) – नाट्यकर्मि समाज नेपालया ग्वसालय् वंगु झिंछन्हु न्ह्यःनिसें थन न्ह्यानाच्वंगु ‘रामशेखरया ख्यालः ब्वज्या’ म्हिगः क्वचाल । ख्यालः ब्वज्याया दकलय् लिपांगु दिं म्हिगः रामशेखर नकःमिया अतिकं लोकंह्वाःगु ‘१२ बजे’ ख्यालः हाकनं क्यनाः ब्वज्या क्वचायेकूगु खः ।
नांजाःम्ह निर्देशक, च्वमि, कलाकार, उपन्यासकार रामशेखर नकःमिं च्वयादीगु गुपु ख्यालः वंगु साउन ९ गतेनिसें साउन १९ गतेतक आस्था सांस्कृतिक समूहया थिएटर लिवालिइ क्यना वयाच्वंगु खः ।
ख्यालः ब्वज्याया दकलय् लिपांगु दिं म्हिगः ‘१२ बजे’ नांया ख्यालः हाकनं क्यंगु खः । थुगु ख्यालः किशोर गोसाइँया निर्देशनय् स्टार वाचनालयं न्ह्यब्वःगु खः । थुगु ख्यालःया ब्वज्या लिसें वंगु झिंछन्हु न्ह्यःनिसें न्ह्यानाच्वंगु ‘रामशेखरया ख्यालः ब्वज्या’ नं क्वचाःगु दु ।
ख्यालः ब्वज्या स्वयेगु निंतिं रामशेखर नकःमिया सहकर्मीलिसें वरिष्ठ निर्देशक, कलाकार गणेश साय्मि, कलाकार महन्तलाल मल्ल, नेपालभाषा
एकेदेमिया भाइस चान्सलर डा. पुष्पराज राजकर्णिकारलिसें आपालं वरिष्ठ कलाकार, साहित्यकार, भाषाह्यमिं थ्यंगु खः ।
ख्यालः ब्वज्याय् दकलय् लिपा क्यंगु ‘१२ बजे’ थ्व स्वयां न्ह्यः ब्वज्याया स्वन्हुया दिं नं क्यंगु खः । स्वन्हुया दिं नं क्यंगु खः । थ्व हे झ्वलय् वइगु साउन २४ गते शनिवाः ख्वप नगरपालिका वडा नं. ९ या सांस्कृतिक गुपिनिगु इनापय् ख्वप कलेजं न्ह्यब्वःगु ‘छेरावति द्यः’ न्हिनसिया ३ ताः इलय् क्यनेत्यंगु दु ।
ख्यालः ब्वज्याया उलेज्या नेपाल मजदुर किसान पार्टीया अध्यक्ष नारायणमान बिजुक्छेँ रोहितं यानादीगु खःसा न्हापांगु दिं ‘खेल खत्तम’ क्यंगु खः । ब्वज्याय् छेरावति द्यः, १२ बजे, खुँयात ज्वँज्वँ, तन्त्र ताब्लेट (खस भाषां), खुँ, तन्त्र ताब्लेट, टुरिष्ट गाइड, अस्पतालया जा व रानी पुखू न्ह्यब्वःगु खः । थुपिं ख्यालःत भक्तपुर साकोस, ख्वप कलेज, स्टार वाचनालय, बहुरंगी रंगकर्मि समूह, बाल विकास स्कुल, प्रभात मावि, श्रमिक साकोस, शहीद निर्मल पुष्प स्मृति वाचनालय व जेँला सांस्कृतिक समाजं न्ह्यब्वःगु खः ।
LEAVE YOUR COMMENTS