
उत्तर कोरियां हाकनं निगः ब्यालेस्टिक मिसाइल परीक्षण याःगु दु । दक्षिण कोरियाली सेनां धाःकथं उत्तर कोरियां थःगु पूर्वी तटपाखें निगः ब्यालेस्टिक मिसाइल कयेकूगु खः । दक्षिण कोरिया समाचार संस्था योन्हापं सेनायात उद्धृत यासें होयो प्रायःद्वीपं स्थानीय ई कथं बुधवाः सुथय् निगः मिसाइल कयेकूगु खः ।
वंगु वालय् नं उत्तर कोरियां चीहाकःगु दूरीया निगः क्षेप्यास्त्र परीक्षण याःगु खः । उत्तर कोरियां थ्व परीक्षणयात कयाः छुं प्रतिक्रिया बिउगु मदुनिसा जापानया रक्षामन्त्रीं छुं नं कथंया क्षेप्यास्त्र थःगु भूभाग तक मथ्यंगु खँ धाःगु दु । बुधवाः परीक्षण याःगु थ्व मिसाइल ४३० किमि दूरी पार यानाः सी अफ जापानय् कुतुं वंगु खँ धाःगु दु ।
उत्तर कोरियाली नेता किम जङ अन व अमेरिकी राष्ट्रपति डोनाल्ट ट्रम्प दथुइ जूगु भेटवार्ता लिपा आणविक हतियार निशस्त्रीकरण सम्बन्धी छुं खँ न्ह्याः मवनेवं उत्तर कोरियां वंगु वालं निसें हाकनं क्षेप्यास्त्र परीक्षण सुरु याःगु खः । निम्ह नेतातय् दथुइ जूगु शिखर सम्मेलनय् धाःसा पारमाणविक हतियार निशस्त्रीकरणया निंतिं हाकनं वार्ता यायेगु सहमति याःगु खः ।
अमेरिका व दक्षिण कोरियां मंकाः कथं यायेत्यंगु सैन्य अभ्यासया विरोधय् नं उत्तर कोरियां थ्व परीक्षण याःगु खँ पिहां वयाच्वंगु दु । थ्व अभ्यास जुल धाःसा निशस्त्रीकरण वार्ता हाकनं प्रभावित जुइफुगु ख्याच्वः उत्तर कोरियां बिया वयाच्वंगु दु । अमेरिकी विदेशमन्त्री माइक पोम्पेओं धाःसा थ्व अभ्यास मदीगु खँ धायेधुंकूगु दु ।
LEAVE YOUR COMMENTS