‘दैनिक भास्कर’यात ७ अर्ब आय सुचुकूगु द्वपं

एजेन्सी- भारतया वित्त मन्त्रालयं भारतया नांजाःगु पत्रिका ‘दैनिक भास्करं’ आय सुचुकूगु द्वपं बिउगु दु । वित्त मन्त्रालयं दैनिक भास्करया सञ्चालकतय्सं खुदँया दुने भारु ७ अर्ब आय सुचुकूगु द्वपं बिउगु खः । आयकर विभागं (सीबीडीटी) वंगु बिहिवाः दैनिक भास्करया थीथी थासय् च्वंगु ज्याकुथिइ छापा मारे याःगु खःसा छापा लिपा सरकारयागु आलोचना व विरोध जूगु खः । सरकारं सत्य समाचार बिउगुलिं पत्रिकायात निशाना दयेकूगु खः धकाः विपक्षीं द्वपं तकं बिउगु खः ।

वित्त मन्त्रालयं प्रेस विज्ञप्ति जारी यासें पत्रिकाय् आयकर सम्बन्धी दुगु कानुनी व्यवस्थाकथं छापा मारे यानागु धाःगु दु । प्रेस विज्ञप्तिइ वित्त मन्त्रालयं पत्रिकाया सञ्चालकतय्गु पुचलं थःपिनि कर्मचारीतय्गु नां तयाः थीथी कम्पनी सञ्चालन यानावयाच्वंगु व थुकियात फर्जी खर्च व फन्डया रुटिङया निंतिं छ्यलीगु द्वपं बियातःगु दु ।

कर्मचारीतय्सं थःपिनिगु नामय् कम्पनी दुगु तकं मसिउगु खँ मन्त्रालयं छापा मारे यानाबलय् सीकाकयागु धाःगु दु । मन्त्रालयं खुदँया दुने थथे यानाः थ्व पत्रिकाया सञ्चालकतय्सं ७ अर्ब भारु आय सुचुकूगु व थ्व ध्यबाया अझ अप्वयेफुगु नं धाःगु दु ।

दैनिक भास्करया पुचलं विद्युत, वसः व रियल स्टेटय् नं लगानी यानातःगु दु । मन्त्रालयया कथं दैनिक भास्कर पुचलं दछिया दुने ६० अर्बया कारोबार यानाच्वंगु दु । थ्व पुचःया होल्डिङ व सहायक कम्पनीं यानाः सछिं मल्याक कम्पनी दु ।