अफगानिस्तानया राष्ट्रपति भवनया लिक्कं स्वगः रकेट कुर्कल

एजेन्सी- अफगानिस्तानया राजधानी काबुलय् च्वंगु राष्ट्रपति भवन लिक्क स्वंगः रकेट कुर्कूगु दु । मंगलवाः सुथय् स्थानीय ईकथं ८ बजे पाखें राष्ट्रपति भवन लिक्क राष्ट्रपति असरफ घानीलिसें मेपिं अफगानी नेतात व दर्जनौं मनूत नमाज ब्वनाच्वंगु इलय् रकेट आक्रमण जूगु खः ।

मंगलवाः अफगानीस्तानय् इद न्यायेकेगु झ्वलय् राष्ट्रपति असरफ घानी नमाज ब्वनाच्वंगु खःसा थ्व ज्याझ्वः टेलिभिजनय् प्रत्यक्ष प्रशारण जुयाच्वंगु खः । प्रत्यक्ष प्रशारणय् विस्फोटया सः तायेदुगु खः । नमाज ब्वनाच्वंपिं नेतात न) ग्याःगु खनेदुगु खःसां सुनानं नमाज ब्वनेगु धाःसा त्वःतामवं ।

नमाज ब्वनेगु ज्याझ्वः क्वचायेधुंकाः राष्ट्रपति घानीं रकेट आक्रमण तालिबानतय्सं याःगु धाःगु दु । राष्ट्रपति घानीं तालिबानतय्के शान्तिया वातावरण दयेकेगु इच्छा मदुगु थ्व घटनां सिद्ध याइ धाःगु दु ।

अफगानिस्तानया गृहमन्त्रीया प्रवक्ता मीरवाइज स्टैनिक्जइं हमला राष्ट्रपति भवनया सुरक्षित थाय्या लिक्क जूगु व सुं नं घाःपाः मजूगु जानकारी बिउगु दु । गृहमन्त्रीया प्रवक्तां स्वगः रकेट आक्रमण जूगु जानकारी बिउगु खः ।

आक्रमणया जिम्मा आतक सुनांन काःगु मदुनिसां थीथी सञ्चार माध्यमय् वःगु समाचारकथं आक्रमण इस्लामिक स्टेटं याःगु अनुमान दु ।
अफगानिस्तानं अमेरिकी सेना लिहां वनेगु शुरु जुसांनिसें तालिबानतय्गु हिंसात्मक गतिविधि अप्वयाच्वंगु दु । तालिबानतय्सं थीथी थाय् थःपिनिगु कब्जाय् नं कायेधुंकूगु दु ।

सम्बन्धित बुखँ

LEAVE YOUR COMMENTS