पाकिस्तानय् संसद विघटन

येँ -पाकिस्तानया प्रधानमन्त्री इमरान खानं संसद भंगया सिफारिस याःगु दु । थःविरुद्ध वःगु अविश्वासया प्रस्तावयात संसदं पनाबीधुंकाः खानं संसद भंग यायेत सिफारिस याःगु खः । खानं आः चुनावया तयारी न्ह्याकेगु घोषणा याःगु दु ।

पाकिस्तानी संसदं अविश्वासया प्रस्ताव खारेज यानाबीवं प्रधानमन्त्री खानं राष्ट्रया नामय् संशोधन यासें राष्ट्रपति समक्ष संसद भंग यायेत सिफारिस यानागु जानकारी बिउगु खः । प्रधानमन्त्री बुइगु खनेदुगु अविश्वासया प्रस्तावय् मतदान याकेत संसदया उपसभामुखं अस्वीकार याःगु खः ।

खानं थःत प्रधानमन्त्रीपाखें चिइकेगु निंतिं अन्तर्राष्ट्रियस्तरं हे षडयन्त्र जूगु धासें अमेरिकां थुकिया योजना दयेकूगु द्वपं नं बिउगु खः । थःगु विदेश नीतिसम्बन्धी निर्णयया कारणं अमेरिकां थःत चिइकेत स्वयाच्वंगु खँ खानं धाःगु दु । थ्व झ्वलय् वय्कलं रुसी राष्ट्रपति भ्लादिमिर पुटिनयात नापलायते मस्को वनागु व अमेरिकाया आतंकवादविरुद्धया लडाइँया आलोचना यानागुलिं अमेरिका थः खनाः तंचायाच्वंगु प्रधानमन्त्री खानया दावी दु ।

विपक्षीतय्सं धाःसा खानया द्वपं हास्यास्पद जूगु व खानविरुद्ध अविश्वासया प्रस्ताव हयेगु निंतिं अमेरिकाया ल्हाः दु धयागु द्वपं असत्य खः धाःगु दु । विपक्षीत प्रधानमन्त्री खानया गठबन्धन दुनेया तःम्ह हे सांसदतय्त थःपाखे सालेत ताःलायेवं खान अविश्वासया प्रस्तावय् पराजित जुइगु खनेदुगु खः ।