ने. सं. ११४४ कौलाथ्व षष्ठी -

तालिवानलिसे अमेरिकी सेना लितयंकेगु सहमति

अमेरिकां अफगानिस्तानं थः सेना लित यंकेगु निंतिं तालिवान लडाकुलिसे सहमति याःगु दु । वाशिंगटनया छम्ह वार्ताकारं धाःकथं अमेरिका व तालिवान दथुइ वइगु नीवाः दुने ५४ सय सैनिक लित यंकेगु सैद्धान्तिक सहमति जूगु दु । वार्ताकार जालमाइ खलिलजादं छगू टेलिभिजन अन्तर्वार्ताया झ्वलय् थ्व सहमतिया बारे विस्तृत जानकारी सार्वजनिक याःगु खः ।

लिसें वय्कलं थ्व सहमति अमेरिकी राष्ट्रपति डोनाल्ड ट्रम्पं अनुमोदन यायेमानीगु खँ नं धाःगु दु ।तालिवान समुहया प्रवक्तां नं बिबिसीलिसे लिखित संवाद यासें खलिलजादं सार्वजनिक याःगु विवरण सत्य जूगु पुष्टि याःगु दु । मेखे वय्कःया थ्व अन्तर्वार्ता प्रसारण जुइवं हे राजधानी काबुलय् छगू तःधंगु विस्फोट जूगु दु ।

तालिबानं थ्व विष्फोटय् थःपिनिगु संलग्नता दुगु खँ धाःगु दु । विस्फोटय् म्होतिं नं १९ म्ह मनूया ज्यान वंगु व सछि व नीम्ह घाःपाः जूगु खँ धाःगु दु । तालिवानं विदेशी सैनिकयात लक्षित यानाः थ्व आक्रमण जूगु खँ धाःगु दु ।थ्व विस्फोट विदेशीत च्वनाच्वंगु छगू भवनया जःखः जूगु खः । तालिवानं उगु भवनय् सशस्त्र लडाकुत च्वनाच्वंगु खँ धाःगु दु ।

मेखे थ्व विस्फोट लिपा तालिवानलिसे अमेरिकी वार्तां अफगानिस्तानय् जुयाच्वंगु न्हियान्हिथंया हिंसा अन्त्य मजुइगु व थुकी सर्वसाधारणयात जक अप्वः लिच्वः लाइगु खँ धाःगु दु । अमेरिका लिसे जूगु सहमति कथं तालिवानं अमेरिकी सेना लिहां वनेवं अमेरिका व वया साझेदार विरुद्ध आक्रमण याइपिनिगु निंतिं अफगानिस्तानयात गुबलें नं अखडा दयेके मबिइगु सुनिश्चित याइ ।

खलिलजादं धाःकथं यदि सहमतिया शर्त पालना जुल धाःसा न्यागू अमेरिकी सैन्य शिविरं १३५ न्हुया दुने सेना लिहां वनी । अफगानिस्तानय् थौंकन्हय् १४ हजार अमेरिकी सैनिक दु ।