चिनिया जनमुक्ति सेना अत्याधुनिक याइगु
चीनं थःगु राष्ट्रिय सेनायात आधुनिक, उच्च प्रविधियुक्त दयेकेगु निंतिं राष्ट्रिय प्रतिरक्षा योजना बुधवाः सार्वजनिक याःगु दु । बेइजिङय् सार्वजनिक याःगु थुगु योजनाय् अमेरिकां विश्व रणनीतिक स्थायित्वयात मस्वःगु द्वपं बिसें ताइवानया स्वतन्त्रता विरुद्ध चेतावनी नं बिउगु दु ।
सन् २०१२ लिपा न्हापांखुसी सार्वजनिक याःगु थ्व स्वेतपत्रय् विश्वया दकलय् तःधंगु सेना व बेइजिङया सैन्य महत्वाकांक्षाया बारे धाःसा छुं न्ह्यथनातःगु मदु । ‘अन्तर्राष्ट्रिय रणनीतिक प्रतिस्पर्धा अप्वया वनाच्वंगु दु’ धासें उगु दस्तावेजय् अमेरिकां थःगु राष्ट्रिय सुरक्षा व प्रतिरक्षा रणनीतियात समायोजन याःगु व एकपक्षीय नीतित अनुसरण याःगु न्ह्यथनातःगु दु ।
अमेरिकां प्रमुख राष्ट्रतय् दथुइ प्रतिस्पर्धायात जबर्जस्ती अप्वयेकूगु, थःगु प्रतिरक्षा खर्च अप्वयेकूगु, आणविक, बाह्य अन्तरिक्ष, साइबर व क्षेप्यास्त्र प्रतिरक्षाय् थप क्षमता निर्माण यायेत अग्रसर जूगु व विश्वया रणनीतिक स्थायित्वयात बेवास्ता याःगु द्वपं नं चीनं बिउगु दु ।
चिनिया सरकारं न्ह्यब्वःगु योजनाय् चीनया जनमुक्ति सेनाया शस्त्रयात उच्च प्रविधियुक्त दयेकेगु खँ न्ह्यथनातःगु दु ।
तर उगु योजनाय् चीनया सैनिक क्षमता मेगु गुलिखे देय्या सेना सरह मजूगु नं स्वीकार यानातःगु दु । उगु राष्ट्रिय सुरक्षा योजनाय् आःया विश्वय् युद्धया शैलीइ हे हिउपाः वःगु व बौद्धिक युद्धकलाय् प्रवेश जूगु खँ न्ह्यथनातःगु दु । आर्टिफिसियल इन्टिलिजेन्स, बिग डेटा, क्लाउड कम्प्युटिङ व न्हूगु व उच्च प्रविधियुक्त सैनिक प्रविधि आःया आवश्यक्ता जूगु खँ योजनाय् धयातःगु दु ।
चीन प्रतिरक्षाय् खर्च याइगु देय् मध्ये विश्वया हे निगूगु थासय् लाः । चीनं स्वयां अप्वः अमेरिकां खर्च यायेगु यानाच्वंगु दु । चीनं सन् २०१९ य् थःगु सैनिक खर्च ७.५ प्रतिशतं अप्वयेकेगु घोषणा न्हापा हे यानातयेधुंकूगु दु । प्रस्तावित योजनाय् चीनं थःगु सेना विश्व शान्तिया निंतिं जक छ्यलेगु खँ नं धयादीगु दु ।
LEAVE YOUR COMMENTS