अमेरिका व सहयोगी देय् विरुद्ध आक्रमण विस्तार यायेगु ख्याच्वः
तेहरान – इरानं यदि थःपिनिगु आणविक व संवेदनशील क्षेत्रय् आक्रमण यायेगु ज्या मदिकल धाःसा अमेरिका व वया सहयोगी देय् विरुद्ध आक्रमण विस्तार यायेगु ख्याच्वः बिउगु दु । इरानं थःपिनिगु आणविक, उर्जा उत्पादन व भण्डारण लिसें मेमेगु संवेदनशील क्षेत्रय् आक्रमण यात धाःसा अमेरिका वया सहयोगी देय्यात लक्षित यानाः आक्रमण विस्ता यायेगु ख्याच्वः बिउगु खः ।
इरानया मुख्य सैन्य कमान्ड खात्म अल अन्बिया केन्द्रीय मुख्यालयं बुधवाः उकथंया ख्याच्वः बिउगु खः । अमेरिकी राष्ट्रपति डोनाल्ड ट्रम्पं अमेरिकाया सेनां इरानया मध्य प्रान्त इस्फहान पहाड क्वय् च्वंगु इरानी आणविक सुविधा केन्द्रय् याकनं हे अमाक्रमण यायेत्यंगु धकाः बिउगु ख्याच्वःया लिसलय् तेहरानं नं उकथंया प्रतिकात्मक ख्याच्वः बिउगु खः ।
अमेरिकां इरानया आणविक व संवेदनशील केन्द्रय् आक्रमण यायेगु ख्याच्वः कार्यान्वयन यात धाःसा थःपिंसं नं उकिया प्रतिक्रिया स्वरुप मध्यपूर्व लागाय् युद्धया विस्तार यानाः अमेरिका व वया सहयोगी व समर्थक देय् विरुद्ध शक्तिशाली आक्रमण यायेगु इरानी सैन्य मुख्यालयं न्ह्यथंगु दु ।
थ्व हे झ्वलय् इरानया इस्लामिक रिभोलुसनरी गार्ड कोप्र्सं थःपिनिगु आधिकारिक समाचार अनलाइन ‘सेपाह न्युज’य् छपु विज्ञप्ती जारी यासें इरानया सेनां कुवेतया अली अल सलेम एअरबेस जःखःया प्रारम्भिक चेतावनी राडार प्रणाली व उकिया जःखःया आपालं सुरक्षा सम्बन्धि राडार नष्ट यानागु न्ह्यथंगु दु ।
थ्व हे झ्वलय् मेगु छगू समाचारकथं अमेरिकी विदेशमन्त्री मार्को रुबियों अमेरिका इरानलिसेया वर्तमान संकट अन्त्य यायेत वार्ता व सम्झौता यायेत तयार दुगु धाःगु दु । विदेशमन्त्री रुबियों अमेरिका इरानलिसे वार्ता यायेत व समस्य ज्यंकेत तयार दुसां इरान धाःसा थ्व विषयय् गम्भिर खने मदयाच्वंगु दाबी नं याःगु दु ।
बीबीसी फारसी समाचार सेवायाकथं दक्षिण-पूर्वी एसियाली देय्या विदेश मन्त्रीतय् बैठकय् रुबियों अमेरिका व इरानया दथुइ ब्वलनाच्वंगु तनावयात कयाः थःगु धारणा तःगु खः ।
‘अमेरिका अझ नं इरानलिसे संकटया अन्त्य व सम्झौताया निंतिं वार्ता यायेत तयार दु’, विदेशमन्त्री रुबियों धाःगु दु, ‘तर इरान वार्ता यायेत गुगुंकथं थजं गम्भिर जुयाच्वगु मदु ।
थ्व हे दथुइ इरानया छम्ह वरिष्ठ अधिकारीं सोमवाः रोयटर्सयात इरानं मध्यस्थकर्ता मार्फत १० न्हुया निंतिं युद्धविरामया प्रस्ताव प्राप्त यानागु जानकारी बिउगु दु ।
LEAVE YOUR COMMENTS