विदेशं लिहां वयेबलय् म्हमसिउपिसं बिउगु समान महयेत इनाप

येँ (नेपालभाषा टाइम्स) – त्रिभुवन अन्तर्राष्ट्रिय विमानस्थल सुरक्षा कार्यालयं विदेशं नेपाः लिहां वइपिं नेपाःमि नागरिकयात लुँ तस्कर व दलालया प्रलोभनय् मलायेत इनाप याःगु दु । कार्यालयं म्हिगः सार्वजनिक सुचं जारी यानाः दुबई, कतार लगायत थीथी देशं श्रम स्वीकृति कयाः कामदार भिसाय् वंपिं नेपाःमितय्त लिहां वइगु इलय् म्हमसिउपिं मनू, दलाल लिसें लुँ तस्करतय्सं आर्थिक प्रलोभन क्यनाः लुँया सिखः, बहुमूल्य धातु व थीथी सामान नेपाः छ्वयाहेगु यानाच्वंगु लूगु खँ धाःगु दु ।

थज्याःगु वस्तु ज्वनाः नेपाः वयेगु झ्वलय् त्रिभुवन अन्तर्राष्ट्रिय विमानस्थलय् कानुन कथं जुइगु जाँचय् अवैध लुँ ल्ह्यःगु द्वपनय् कानुनी कारबाही फयेमाःगु अवस्था जुयाच्वंगु धासें कार्यालयं फुकसित सचेत जुइत इनाप याःगु दु । कार्यालयं म्हमसिउपिं मनू व दलालं बिउगु लुँ, बहुमूल्य धातु वा गुगुं नं कथंया सामान ज्वनाः नेपाः मवयेत इनाप याःगु दु ।

उकथं हे मेपिनिगु झोला वा प्याकेटया वास्तविक विवरण मथुइक थःगु जिम्माय् मकायेत व सामान न्यानागु बिल वा मेगु भ्वं दुगु आधारय् कानुनी जिम्मेवारीं मुक्त जुइ धइगु भ्रमय् मच्वनेत इनाप नं याःगु दु । चीधंगु लापर्वाहीं तःधंगु कानुनी समस्या वइ धासें सचेत नं याःगु दु ।