कोरोना संक्रमित मालेत खिचायात ‘तालिम’
एजेन्सी – खिचाया नतुनेगु क्षमता छ्यलाः कोरोना भाइरसया संक्रमण पत्ता लगे याये फइला धकाः बेलायतय् परीक्षण सुरु यायेत्यंगु दु । मेडिकल डिटेक्सन डग्स नांया संस्थां थ्वयां न्ह्यव नं औलो, क्यान्सर व पार्किन्सन्स थेंज्याःगु ल्वय् नतुनाः पत्ता लगे यायेत खिचातय्त तालिम बीधुंकूगु दु ।
विश्वन्यंकं कोभिड १९ महामारी कथं न्यना वनाच्वंगु इलय् डरम युनिभर्सिटी व लन्डन स्कुल अफ हाइजीन एन्ड ट्रपिकल मेडिसिनलिसे जानाः उगु संस्थां खिचायात कोरोना संक्रमण पत्ता लगे यायेगु तालिम बीत्यंगु खः ।
मेडिकल डिटेक्सन ड्रग्सया प्रमुख क्लेअर गेस्टया कथं विरामीपाखें सुरक्षित रुपं भाइरसया गन्ध पत्ता लगे यायेगु उपाय मालाच्वंगु दु । वय्कलं धयादीगु दु ‘सिद्धान्ततः खिचां कोभिड १९ पत्ता लगे यायेफइ धयागु खँय् जिपिं विश्वस्त दु ।’
यदि थ्व खँ प्रमाणित जुल धाःसा लक्षण खनेमदुपिं संक्रमिततय्त नं माले फइ । गेस्टया कथं खिचायात छ्यलाः याकनं व प्रभावकारी ढंगं संक्रमण पत्ता लगे यायेफइ । अथे जुल धाःसा एनएचएसया साधन व स्रोतया आवश्यक परीक्षणय् जक छ्यलेफइ ।
लन्डन स्कुल अफ हाइजिन एन्ड ट्रपिकल मेडिसिनया रोग नियन्त्रण विभागया प्रमुख प्राध्यापक जेम्स वोगनया कथं अनुसन्धानपाखें खिचां नतुनाः औलो ल्वय् पत्तालगे यायेफुगु प्रमाणित जुइधुंकूगु दु । खिचाया थ्व क्षमता विश्व स्वास्थ्य संगठनं ल्वय् निदान यायेत तोके यानातःगु मापदण्ड स्वयां अप्वः दु ।
(ने. सं. ११४० चौलाथ्व ५ / वि. सं २०७६ चैत १६, आइतवाः)
LEAVE YOUR COMMENTS