कोरोना भाइरसया उत्पत्ति प्राकृतिक : डब्लुएचओ

येँ – विश्व स्वास्थ्य संगठनं (डब्लुएचओ) विश्वन्यंक महामारी जुयाच्वंगु कोरोना भाइरया उत्पत्ति प्राकृतिक रुपं जूगु खँ धाःगु दु ।

अमेरिकी राष्ट्रपति डोनाल्ड ट्रम्पं भाइरया उत्पत्ति चीनया वुहान इन्सटिच्युट अफ भायरोलोजीं जूगु दावी यानादीगु कन्हय् कुन्हु स्वास्थ्य संगठनं थज्याःगु प्रतिकृया बिउगु खः । स्वास्थ्य संगठनया आपत्तकालिन प्रमुख माइकल रायनं थुगु भाइरस प्राकृतिक रुपं उत्पत्ति जूगु धयादिसें थुकीया बारे तःक्व हे आपालं वैज्ञानिकतय्सं पुष्टि यायेधुंकूगु धयादिल ।

स्वास्थ्य संगठनं न्हापांनिसें धयाच्वंगु खँ लिसाकयादिसें आपत्तकालिन प्रमुख रायनं धयादी, ‘भाइरस प्राकृतिक रुपं जूगु धाइगु खँय् झी आश्वस्त दु ।’

राष्ट्रपति ट्रम्पं वुहानया ल्याबं कोरोनाया भाइरस उत्पत्ति जूगु प्रमाण थःम्ह स्वयेधुनाःगु खँ बिहीवाः पत्रकारतय्त कनादीगु खः । नापं वय्कलं कोरोना भाइरसयात कयाः डब्लुएचओ चीनया प्रवक्ता कथं जक न्ववानाच्वंगु द्वपं नं बियादीगु खः ।