विदाय् मच्वंसे ज्या यायेवं

गुगुं नं ज्याकू, पसः वा थः खटे जुयाः वनाच्वंगु कार्यक्षेत्रय् ई स्वयां अप्वः ज्या यात धाःसा वयात हाकिम वा मालिकं तसकं माने याइ । ई स्वयां नं अप्वः लगनशील जुयाः ज्या यात धाःसा व मनू हाकिम वा मालिकया यःम्ह कामदार नं जुइ । अले वयात अप्वः ध्यबा नं बी । पुरस्कृत नं याइ । तर छम्ह कामदारं धाःसा आवश्यकता स्वयं अप्वः ज्या याःगुलिं हे दण्डित जुइमाःगु दु । थ्व घटना फ्रान्सया खः । फ्रान्सया नियम हे थ्व दु कि अन ज्या याइपिंसं वाःया छन्हु विदाय् च्वने हे माः । ज्याकू ज्या याइपिं जक मखु, थःगु हे व्यापार व्यवसाय याना वयाच्वंगु जूसां छन्हु सुलं च्वनेमाः । थ्व हे नियम माने मयासे आवश्यकता स्वयां अप्वः ज्या याःगुलिं सेड्रिक भाइब्रे नांया उम्ह मनूयात दण्डित याःगु दु । फ्रान्सेली नियमकथं ई स्वयां अप्वः ज्या याःगुलिं भाइब्रेयात स्वंगूत्या लाख तका स्वयां अप्वः जरिवाना याःगु दु । भाइब्रे कामदार मखु, व थःगु हे बेकरी व्यवसाय याना वयाच्वंम्ह खः ।

भाइब्रे राजधानी पेरिसं १२० माइल दक्षिण पूर्वय् लाःगु लेक बेकी धइगु थासय् बेकरी पसः चले यानाच्वंम्ह खः । थःगु बेकरी उद्योगय् उच्च रुपं माग अप्वयेवं उकियात पूर्ति यायेत भाइबे्रं छवाः न्हय्न्हुयंकं ज्या यानाच्वंगु जुयाच्वन । भाइबे्र विदाय् मच्वँसे उकथं ज्या यानाच्वंगु अनया स्थानीय सरकारी निकायं सीकल अले वयात स्थानीय श्रम कानुनकथं प्रहरीं ज्वन ।
भाइब्रेयात कामदारतय्त श्रम शोषण याःगु धासें वयात ३००० हजार युरो जरिवाना याःगु खः । खतुं लिपांगु इलय् कामदारतय्त शोषण याःगु धासें स्थानीय प्रशासन बेकरी व्यवसाय विरुद्ध कडा रुपं कुहां वयाच्वंगु दु ।