धाकुफय् व खुसिबालय् लानाः अमेरिकाय् ४५ म्ह सित

एजेन्सी- अमेरिकाया उत्तर पूर्वी लागाय् आइदा धाकुफसं यानाः तसकं वा वयाः वःगु खुुसिबाः व टोर्नाडों यानाः सीपिनीगु ल्याः ४५ थ्यंगु दु । अमेरिकाया राष्ट्रपति जो बाइडेनं जलवायु परिवर्तनं यानाः वःगु थ्व समस्यालिसे ल्वायेत ऐतिहासिक लगानी मालीगु धाःगु दु । राष्ट्रपति जो बाइडेनं देय्न्यकं जलवायु परिवर्तनया समस्या जुयाच्वंगु व थुकिया सामना यायेगु धयागु जीवन–मरणया न्ह्यसः जूगु धाःगु दु । राष्ट्रपति जो बाइडेनं न्यूयोर्क व न्यू जर्सीइ सकंटकाल घोषणा यायेधुंकूगु दु ।

अमेरिकाया खूगु राज्यय् मानवीय क्षति जूगु अन्तर्राष्ट्रिय सञ्चार माध्यमतय्सं धाःगु दु । आःतक अमेरिकाया न्यू जर्सीइ २३ म्ह, न्यूयोर्कय् १४ म्ह, पेन्सिल्भानियाय् न्याम्ह मनू सीगु दु । अथे हे कनेटिकट, मेरील्याण्ड व भर्जिनियाय् नं मनूत सीगु दु ।

न्यूयोर्क व न्यू जर्सीइ अझ नं तसक वा वयाच्वंगु दनि । थ्व निगुलिं राज्य डुबानय् लानाच्वंगु दु । रेल व हवाइ सेवा नं बन्द जुयाच्वंगु दु । जलवायु परिवर्तन यानाः वःगु थ्व समस्यां अझ गुलि क्षति याइ धयागु सीमदुनि । मौसमविद्तय्सं बिउगु जानकारीकथं समुद्री सतहया तापक्रम थहां वन धाःसा धाकुफय् अझ शक्तिशाली जुइफु धाःगु दु । धाकुफय् व खुसिबालय् लानाः अमेरिकाय् ४५ म्ह सित ।