क्यालिफोर्नियाय् लिभुखाय् जारी
अमेरिकाया क्यालिर्फोनियाय् शक्तिशाली भुखाय् ब्वयेधुंकाः हाकनं व स्वयां तच्वःगु लिभुखाय् ब्वःगु दु । अमेरिकी भौगर्भिक सर्वेक्षण संस्था युएसजीएसया कथं शुक्रवाः सवा आठबजे पाखे ७.१ म्याग्निच्युडया लिभुखाय् ब्वःगु खः। थ्वयां न्ह्यव बिहिवाः ६.४ म्याग्निच्युडया भुखाय् ब्वःगु खः । शुक्रवाः ब्वःगु भुखाय् बिहिवाःया हे पराकम्पन जूगु खँ धाःगु दु ।
शुक्रवाः ब्वःगु लिभुखाय्या केन्द्रविन्दु लस एञ्जल्स शहर स्वयां थ्यंमथ्यं २५० किलामिटर उत्तरय् लाःगु रिजक्रेस्ट शहर खः ।थ्यंमथ्यं २५ दँ लिपा क्यालिफोर्नियाया दक्षिण क्षेत्रय् केन्द्रविन्दु जुयाः तःभुखाय् ब्वःगु खः । थ्व तःभुखाय् लिभुखाय् अझं वयाच्वंगु दनिसां भौगर्भिक विज्ञतय्सं अझं यक्व शक्तिशाली पराकम्प वयेफुगु खँ धाःगु दु ।
तःभुखाय् ब्वः छुं ई लिपा हे हाकनं ५.४ रेक्टर स्केलया लिभुखाय् ब्वःगु खः । बिहिवाः सनिलय् वःगु थ्व पराकम्प लिपा यक्व मनूत ग्यानाः भागदौड यायेवं स्थिति असामान्य जूगु खँ स्थानीय अधिकारीतय्सं धाःगु दु । तः भुखाय् ब्वये धुंकाः जक ८० गू पराकम्प वयेधुंकूगु खँ अमेरिकन भौगर्भिक सर्वेक्षण संस्था (युएसजिएसं) धाःगु दु ।
थ्यंमथ्यं निगू करोड जनसंख्या दुगु क्यालिफोर्नियाय् २५ दँ लिपा ब्वःगु थ्व भुखाचं स्थानीय मनूतय्त त्रष्ट याःगु दु । तर भौतिक व मानवीय क्षति धाःसा तच्वःगु मजूगु खँ धाःगु दु । भुखाचं यानाः छुं मनूत घाःपाः जूगु दुसा ग्यासया पाइपलाइन तज्यानाः छुं छेँ मिं नःगु दु ।
LEAVE YOUR COMMENTS