ने. सं. ११४३ ञलाथ्व चतुर्दशी -

मास्क तयातःपिनि ख्वाः म्हसीकेगु प्रविधि

एजेन्सी – जापान प्रविधि विकास कम्पनी एनईसीं मास्क तयातःपिं मनूतय् ख्वाः नं म्हसिइके फइगु न्हूगु प्रविधि विकास याःगु खः । थ्व प्रविधिं मनूतय्सं थःगु ख्वाःयात मास्कं त्वपुना तइबलय् मास्कं त्वमपूगु मिखा, कपाः थेंज्याःगु ब्वःयात केन्द्रीत यानाः स्वयाः मनूतय् ख्वाः म्हसीकी । थ्व प्रविधिं १ सेकेन्ड स्वयां म्हो इलय् हे मनूतय् ख्वाः म्हसीकेफुगु व थ्व प्रविधिं म्हसीकीगु ख्वाः ९९.९ प्रतिशत सही जूगु खँ धाःगु दु। लन्डनया प्रहरीं भीडय् निगरानीतय्गु निंतिं एनइसीया थ्व नियोफेस लाइभ फेसियल रिकग्निसन धाःगु प्रविधि छ्यलेधुंकूगु दु। अथेहे लुफ्थान्सा व स्वीस इन्टरनेशनल एयरलायन्सं नं थ्व प्रविधि छ्यलेधुंकूगु दु ।

एनईसीं थ्व प्रविधियात टोकियोया हे छगू भुक्तानी पसलय् नं परीक्षण यानाच्वंगु दु। एनईसीया डिजिटल प्लेटफर्म शाखाया सहायक प्रबन्धक शिनिया ताकाशिमां रोयटर्स समाचार संस्थालिसे खँ ल्हासें थ्व प्रविधिं थीथी अवस्थाय् मनूतय् ख्वाः तप्यंके क्यनेमाःगु बाध्यतापाखें मुक्ति बीगु खँ धयादीगु दु। कोरोना भाइरस महामारी थेंज्याःगु अवस्थाय् थ्व प्रविधित तसकं आवश्यक जूगु खँ वय्कलं धयादीगु दु ।

नेशनल इन्ष्टिच्यूट अफ स्ट्यान्डर्डस् एन्ड टेक्नोलोजीं कोरोनो भाइरस महामारी न्ह्यः थज्याःगु ख्वाः म्हसीकेगु प्रविधिं २० निसें ५० प्रतिशत तक मास्क तयातःपिं मनूतय् ख्वाः म्हसीकेमफुगु खँ धाःगु दु। तर सन् २०२०या अन्त्य तक वःबलय् थ्व प्रविधिइ यक्व हे सुधार वयेधुंकूगु खँ धाःगु दु। फेसियल रिकग्निसन प्रविधियात कयाः विवाद नं ब्वलनाच्वंगु दु। थ्व प्रविधिं यानाः गोपनीयता हनन याइगु नैतिक न्ह्यसःत ब्वलनाच्वंगु दुसा थुकिया लिसें थ्व प्रविधिं सुयागुं नं म्हया छ्यंगूया रंगयात म्हसीकेगु याइ धयागु खँ नं पिहां वयाच्वंगु दु ।

वेल्सया प्रहरीं वंगु अगस्टय् छ्यःगु थज्याःगु स्वचालित प्रविधि गैरकानुनी जूगु अनया छगू अदालतं आदेश बिउगु दु। अमेरिकाय् नं ततःधंगु प्रविधि कम्पनीं प्रहरी अधिकारीतय्सं छ्यलाच्वंगु थज्याःगु प्रविधियात बन्द यानाबिउगु दु। उमिसं थ्व प्रविधि गुकथं छ्यलेगु धयागु निर्णय यायेत कानुन निर्मातातय्त ई बिइगु निंतिं आःयात बन्द यानागु खँ धाःगु दु ।