कानुनी लडाइँ नकतिनि सुरु जुल

एजेन्सी – अमेरिकी राष्ट्रपति डोनाल्ड ट्रम्पया प्रवक्ता राष्ट्रपति चुनावया लिच्वःयात कयाः नकतिनि जक कानुनी लडाईँ सुरु जूगु खँ धयादीगु दु । नोवेम्भर ३ य् जूगु चुनावय् डेमोक्य्राटिकया जो बाइडेन त्याःगु खः । निक्वःगु कार्यकालय् नं राष्ट्रपति जुइगु म्हगस खंका च्वंम्ह रिपब्लिकन उम्मेदवार डोनाल्ड ट्रम्पं थ्व चुनावया मतपरिणामयात स्वीकार याःगु मदुनि । वय्कः मतगणनाया लिच्वः विरुद्ध अदालतय् वनाच्वंगु दु ।

राष्ट्रपति कार्यालय ह्वाइट हाउसया प्रवक्ता केली म्याकनेनीं धयादीगु दु, ‘चुनाव क्वचाःगु मदुनि । आः थ्व क्वचायेत यक्व ई काइतिनि ।’ वय्कलं चुनावय् धाँधली यानाः लिच्वःयात प्रभावित याःगु धासें थुकिया विरुद्ध नकतिनि कानुनी लडाइँ सुरु जूगु खँ धयादीगु खः । वय्कलं चुनावय् धाँधली जूगु धयादीसां उकिया प्रमाण धाःसा छुं बियामदी ।

मेखे राष्ट्रपति ट्रम्पं नं छक्वःपतिकं ट्विट यानाः चुनावय् अवैध गतिविधि जूगु द्वपं बिइगु यानाच्वंगु दु।तर वय्कलं नं मतगणनाय् धाँधली जूगु धयागुया प्रमाण धाःसा आःछक छुं बियादीगु मदुनि । थ्वहे दथुइ सत्ता हस्तान्तरणय् पंगः थनेगु निंतिं ट्रम्प प्रशासन अलमल यायेगु ज्या यानाच्वन धाःसा थुकिया विरुद्ध कानुनी प्रक्रियाय् वनेगु निंतिं नवनिर्वाचित राष्ट्रपति जो बाइडेनं नं प्रक्रिया न्ह्याकेधुंकूगु खँ धाःगु दु। ट्रम्पं चुनावय् धाँधली जूगु धकाः द्वपं बियाः अदालत वंगु धयागु सत्ता हस्तान्तरण ज्या लिबाकयेगु निंतिं खः धयागु खँ नं वयाच्वंगु दु। कानुनी प्रक्रियाय् दुहां वने धाःसा थ्व प्रक्रिया तसकं ताःहाकः जुइ । अथे जुल धाःसा ट्रम्प अन्तरिम रुपं जूसां सत्ताय् हे दयाच्वनी ।