बेलायतय् हाकनं लकडाउन

चिकित्सकं सुयात म्वाकेगु, सुयात स्यायेगु निर्णय यायेत बाध्य जुइफु

येँ (नेपालभाषा टाइम्स) – बेलायतय् निक्वःखुसी लकडाउन घोषणा याःगु दु । प्रधानमन्त्री बोरिस जोन्सनं स्वास्थ्य व नैतिक विपति पनेगु निंतिं राष्ट्रब्यापी लकडाउन घोषणा यायेमाःगु खँ धयादीगु दु। वय्कलं वइगु क्रिसमस तसकं फरक जुइफुगु धयादिसें तर आः ल्ह्वनागु पलाखं यानाः उबलय् छेँजःपिं नापलायेफइगु आशा नं प्वंकादीगु दु ।

बेलायतय् आः पब, रेष्टुराँ, जीम लिसें अति आवश्यक धलखय् मलाःगु पसःत प्यवाःया निंतिं बन्द याइगु जूगु दु । तर न्हापांगु लकडाउनया इलय् बन्द याःगु स्कूल, कलेज, विश्वविद्यालय धाःसा थ्व पालय् चालीगु खँ धाःगु दु । डिसेम्बर २ निसें थ्व लकडाउन छ्वासुकीगु जूसां थीथी थासय् अझ नं प्रतिबन्ध दयेफु धाःगु दु ।

प्रधानमन्त्री निवास डाउनिङ स्ट्रिटय् प्रेस सम्मेलन यासें वय्कलं लकडाउनया कारणं व्यवसायय्लाइगु लिच्वः तसकं दुःखद् जूसां ज्यामितय्त सरकारं ज्या मयाःसां ८० प्रतिशत तलब बीगु फरलो प्रणाली नोवेम्भर तक जारी जुइगु खँ नं धयादीगु दु । थ्व झ्वलय् वय्कलं वंगु अप्रिलय् स्वयां बांमलाक संक्रमण अप्वःगु व मृत्यु दर नं अप्वःगु कारणं सुं नं जिम्मेवार प्रधानमन्त्री वयात बेवास्ता यायेफइमखु धयादीगु दु ।

वय्कलं आः संक्रमण तुलनात्मक रुपं म्हो खनेदुसां बेलायत दक्षिण पश्चिमी क्षेत्रीया अस्पतालय् तकं छुं न्हि लिपा बिरामीया चाप फयेमफइगु अवस्थाय् थ्यनीगु खँ धयादीगु दु । वय्कलं धयादीगु दु, ‘आः डाक्टर व नर्सतय्सं सुयागु उपचार यायेगु, सुयागु मयायेगु, सुयात अक्सिजन बीगु, सुयात मबीगु व सु सीगु, सुयात म्वाकेगु धयागु निर्णय यायेत बाध्य जुइफु ।’